Eńbekshiqazaq aýdandyq ákimdiginiń málimetinshe, baǵdarlamanyń arqasynda 3152 jumys orny qurylǵan, sonyń 1576-sy aýdandyq Jumyspen qamtý ortalyǵy arqyly tartylǵan. Qurylys jumystary aıaqtalǵannan keıin 250 turaqty jumys orny ashylatyn bolady.
Atalǵan 106 jobanyń 46-sy – bilim salasynyń nysany. Máselen, mamyr aıynda Esik qalasynda 1500 oryndy mekteptiń qurylysy bastalǵan, al Áımen orta mektep ǵımaratyna, I.Sattarov atyndaǵy mektep janyndaǵy balabaqshada, O.Jandosov atyndaǵy mekteptiń shatyryna kúrdeli jóndeý jumystary júrgizilýde. Sol sııaqty 42 mekteptiń mektep ishindegi ájethanasyn jóndeý isi de osy baǵdarlama aıasynda sheshiledi.
Mádenıet pen sporttan 3 nysan engizilgen. Kóldidegi mádenıet úıi, Esiktegi aýdandyq mádenıet úıi, K.Bıjanov aýylyndaǵy sport kesheni de qaıta jańaratyn bolady.
TÚKSh salasynda da birqatar jumystar atqarylady. Ashysaı aýylynyń saıabaǵy, 5 aýyldyń kósheleri jaryqtandyrylsa, Qyzylsharyq aýylyndaǵy elektr júıeleri qaıta jańartylyp, salynady. Al Esik toptyq sý qubyry qurylysynyń birinshi kezegi bul saladaǵy eń iri nysan bolmaq.
Jergilikti mańyzdaǵy avtokólik joldaryndaǵy qurylys jumystarynyń basym bóligi aıaqtalǵan. Mundaǵy 46 nysannyń 27-si jóndelip bitti. Onyń 24-i kentishilik joldar men trotýarlardy aǵymdaǵy jóndeý, 3 nysan ortasha jóndeýge jatady. Avtokólik joldaryndaǵy qurylys jumystaryna 1,6 mlrd. teńge qaralǵan.
Atalmysh baǵdarlama aıasynda oblystyq bıýdjetten Shelek polıtehnıkalyq kolledjiniń kúrdeli jóndeýi men Shelek aýylyndaǵy aýdandyq aýrýhananyń japsarjaıynyń qurylysy júrgizilýde. Sol sııaqty Kóktóbe aýylynda bir aýysymda 50 adamdy qabyldaıtyn dárigerlik ambýlatorııa salynyp jatyr.
Nysandardyń barlyǵynda qurylys jumystary jyldyń sońyna deıin aıaqtalady dep josparlanǵan.
Atap ótsek, Almaty oblysy boıynsha «Jumyspen qamtý jol kartasy» aıasynda 977 jobany júzege asyrýǵa 109,2 mlrd. teńge bólingen.
