Konferensııada birinshi bolyp sóz alǵan «Erekshe Tańdaý-Shelek» korporatıvtik qorynyń baǵdarlamalyq dırektory Zahıra Begalıeva erekshe qajettiligi bar adamdar arasynda jumyssyzdyqty joıýǵa kompıýterlik quzyrettilikterdi meńgermeý sebep bolatynyn aıtty.
– Qazirgi búkil álemge taralǵan vırýstan saqtanýdyń eń tıimdi joly – oqshaýlaný. Sol sebepti qanshama azamatymyz ózderiniń jumys oryndaryn tastap, qashyqtan eńbek etýge kóshti. Osy rette kóp adam, sonyń ishinde múmkindigi shekteýli qyzmetkerler kompıýterlik quzyrettilikteriniń tómendiginen jumystarynan aıyrylyp qaldy. Búginde elimizde 695 myń múmkindigi shekteýli azamat bar. Sondaǵy 424 myń eńbekke qabiletti azamattyń tek 112 myńy ǵana, ıaǵnı 26 paıyzy jumyspen qamtylǵan. Bul – Eńbek jáne halyqty áleýmettik qorǵaý mınıstrliginiń 2020 jylǵy deregi. EYDU elderinde mundaı kórsetkish 40 paıyzdy quraıdy. Osy máselege jaýapty mınıstrlik múgedekterdi jumyspen qamtý kórsetkishin 2021 jylǵa qaraı 30 paıyzǵa jetkizýdi maqsat etip otyr. Bıylǵy kóktemde júrgizilgen saýaldamanyń nátıjesinde múmkindigi shekteýli azamattardyń kóbi aqparattyq tehnologııadan beıhabar ekeni anyqtaldy. Sol saýaldamaǵa qatysýshylardyń basym bóligi SMM, onlaın-saýda, jarnama, baǵdarlamalaý boıynsha oqyǵysy keletinin jetkizdi, – dedi Z.Begalıeva.
Onyń aıtýynsha, «Erekshe Tańdaý-Shelek» korporatıvtik qory osy máselelerdi eskerip, «LIDERZ» jobasyn qolǵa alǵan. Jobany júzege asyrýǵa «Samuryk-Kazyna Trust» áleýmettik jobalardy damytý qory seriktes retinde qoldaý kórsetip otyr. Múmkindigi shekteýli jandar onlaın-mektepte kompıýterlik saýattylyq, SMM-mendjment, grafıkalyq dızaıner, tıpografııa sekildi qazirgi tańda suranysqa ıe mamandyqtardyń kýrsynan óte alady. Uıymdastyrýshylar joba aıasynda bilim alǵan azamattardy oqytyp qana qoımaı, jumysqa ornalasýyna kómektesýdi de kózdeıdi.
Al Aqparat jáne qoǵamdyq damý mınıstrligi janyndaǵy Azamattyq qoǵam isteri komıtetiniń tóraǵasy Madııar Qojahmet elimizdegi múmkindigi shekteýli azamattardyń áleýmettik múmkindigin arttyrý eń ózekti máselelerdiń birine aınalǵanyna toqtaldy.
– Úkimettik emes uıymdar erekshe qajettilikteri bar adamdardy jumysqa ornalastyrýda, bilim berýde, fızıkalyq jáne emosıanaldy turǵyda damytýǵa jańa sheshimder qabyldaı alady. Olardyń kópshiligi qazirdiń ózinde áleýmettik kásipkerlikpen aınalysyp, osy baǵytta da jemisti jumys isteı alatynyn, básekege qabiletti bola biletinin dáleldedi. Biraq áleýmettik kásipkerlikpen aınalysatyn ÚEU sany – jalpy uıymdar sanyna shaqqanda óte az. Sondyqtan osyndaı uıymdardyń qataryn kóbeıtý kerek. Al pandemııa bizge zamanaýı qyzmetter adamdardyń fızıkalyq múmkindikterine emes, kompıýterlik mehanızmderdi meńgerý múmkindigine baılanysty bolatynyn kórsetti. Sol sebepti IT salasyndaǵy qyzmetterge múmkindigi shekteýli azamattardy qarqyndy daıarlaý qajet. Al osy maqsatta qolǵa alynyp otyrǵan «LIDERZ» jobasy múmkindigi shekteýli azamattarǵa ózin damytýda múmkindikterdiń sheksiz ekenine taǵy bir márte dálel bola alady, – dedi M.Qojahmet.
