Oqıǵa ornyna Batys Qazaqstan oblystyq Tótenshe jaǵdaılar departamentiniń jedel qutqarý jasaǵy jáne polısııa qyzmetkerleri jetken. Biraq, ókinishke qaraı ushqysh, ıaǵnı ushaq ıesi Pavel Eroshenko jedel járdem jetkenge deıin qaza tapqany belgili boldy.
- Apat bolǵan jerge tótenshelikterdiń 4 kóligi, 18 qyzmetker bardy. Ushqysh sol jerde qaza tapqan. Basqa zardap shekkender joq, - dep habarlady Batys Qazaqstan oblystyq Tótenshe jaǵdaılar departamenti.
Marqum Pavel Eroshenko 1951 jyly týǵan, ol úsh myń saǵattyq ushý ótili bar tájirıbeli ushqysh bolǵan. Jaqyn týystarynyń aıtýynsha, «Mechta» dep at qoıǵan osy ushaǵyn on jyldan beri ózi qurastyrǵan eken. О́tken senbi, 22 tamyz kúni ushaǵyn áýege tuńǵysh ret kóterip, alańqaıdy aınalyp, aman-esen qonǵan kórinedi.
Pavel Alekseevıchti biletinder san qyrly, romantık adam edi dep eske alyp jatyr. Ol óleń jazyp, án shyǵarǵan, jergilikti kórkemónerpazdar konsertterine qatysyp, óner kórsetip júrgen. Áleýmettik jelilerde Pavel Eroshenkonyń óleńderi, estelik jazbalary, án aıtqan vıdeojazbalary saqtalǵan.
