Jobanyń jalpy ınvestısııasy – 18,4 mlrd teńge. Qomaqty qarjynyń maqsatty jumsalýyn sybaılas jemqorlyqqa qarsy is-qımyl departamenti qamtamasyz etetin bolady. Jemqorlyqqa qarsy qyzmet pen bas merdiger "Jel Elektrık" seriktestigi "Protecting Business and Investments" jobasy aıasynda osyndaı kelisimge kelip otyr.
– Nysandy salý kezinde sybaılas jemqorlyq táýekelderin azaıtý maqsatynda osyndaı sheshim qabyldandy. Bizdiń basty mindetimiz – bızneske qolaıly jaǵdaı jasaý jáne qandaı da bir sybaılas jemqorlyq táýekelderin túbirimen joıý. "Protecting Business and Investments" jobasynyń basty maqsaty da – osy. Joba aıasynda bıznes ortada sybaılas jemqorlyqtyń aldyn alý jáne memlekettik organdarmen ózara is-qımyl barysynda ınvestorlar men kásipkerlerge kómek kórsetý qarastyrylǵan, – dedi sybaılas jemqorlyqqa qarsy is-qımyl departamentiniń basshysy Qýanysh Bekbasov.
Aýqymdy joba "Jańartylatyn energııa kózderin damytý" baǵdarlamasy arqyly júzege asyrylady. Jańa jel elektr stansııasy iske qosylsa, aýaǵa gaz býynyń bólinýi jylyna birneshe myń tonnaǵa deıin azaıady.
Qostanaı oblysynda Protecting Business and Investments jobalyq keńsesi ashylǵannan beri sybaılas jemqorlyqtyń aldyn alý maqsatynda 44 kelisim jasalǵan.
