Mınıstr Mártók aýdanyndaǵy egis jáne sút, qurama jem óndiretin sharýashylyqtarda bolyp, jergilikti taýar óndirýshilermen júzdesti. "Aqtóbe aýylsharýashylyq kolledjinde" stýdenttermen kezdesip, jumys saparyn Muǵaljar aýdanyndaǵy asyl tuqymdy jylqy ósiretin sharýashylyqta qorytyndylady.
Mártók aýdanynda 8800 gektar jerge bıdaı, arpa, júgeri, jońyshqa egip, qurama jem óndiretin "Rad Agro" JShS "Bıznestiń jol kartasy-2020" memlekettik baǵdarlamasy arqyly júrgizilgen ınfraqurylym jelilerin tanystyrdy. "Agrarlyq nesıe korporasııasy" arqyly Kanadadan 6 sýarý mashınasyn satyp alǵan osy sharýashylyq 860 gektar jerde baý-baqsha men kókónis ósirip otyr. Budan soń táýligine 50 tonna sút óndirip, oblys aýmaǵynan basqa Batys Qazaqstan, Atyraý oblystaryna sút ónimderin shyǵaryp otyrǵan "Aıs" JShS-niń sehtaryn da aralap qaıtty.
"Aqtóbe aýylsharýashylyq kolledjinde" stýdentter óz qoldarymen aǵashtar men butalardyń júzdegen túrin ósirgen tálimbaqtyń jumysymen tanysty. Oqý ordasynyń aýlasynda aýylsharýashylyq ónimderiniń kórmesi uıymdastyrylyp, onda oblystyń 20-ǵa jýyq kásiporny shyǵaratyn et, sút, bal, sýsyndar men, kókónis, nan ónimderi usynyldy. Saparhan Omarov pen oblys ákimi Ońdasyn Orazalın aýyl sharýashylyǵy taýar óndirýshilermen kezdesip, sharýalar ózderi tap bolǵan qıyndyqtardy ortaǵa saldy. Eń ózekti másele – aýyl sharýashylyǵy taýar óndirýshileri nesıe alý mehanızmderin ońaılatý men aýyl sharýashylyǵy tehnıkalarynyń qoljetimdiligin qamtamasyz etýge kómek surady.
Muǵaljar aýdanynda asyl tuqymdy "Muǵaljar" jylqylaryn ósirip, kóbeıtýmen aınalysyp jatqan sharýashylyqtyń jumysymen tanysý kezinde "Et jáne sút ónimi baǵytyndaǵy jylqy tuqymdary" palatasynyń dırektory Erkegúl Tilegen mınıstrden asyl tuqymdy jylqy basyn kóbeıtýge memlekettik qoldaýdy kúsheıtýdi surady.
Saparhan Omarov Aqtóbe oblysyna jumys saparynyń sońynda:
– Sharýalarmen kezdesý barysynda kóterilgen suraqtardy jınaqtap, taldaıtyn bolamyz. Bıyl kóktemde pandemııaǵa baılanysty qıyndyqtar aýyl sharýashylyǵyn da aınalyp ótken joq. Egis jumystaryn uıymdastyrý, syrttan tehnıka ákelý men mamandardyń kelýi qıynǵa tústi. Oblystardyń arasyndaǵy barys-kelis qıyndaǵan kezde aýylsharýashylyǵy taýar óndirýshilerine "jasyl dáliz" jasap berýimizdiń arqasynda egis jumystary óz mezgilinde aıaqtaldy. Ras, jaz qıyndaý boldy, kóp óńirlerde maýsym, shildede jańbyr jaýmaı, bul egistiń shyǵymdylyǵyna áser etti. Aqtóbe oblysynda astyq ósimi jaqsy. Oblys keregin jabady, qalǵanyn eksportqa shyǵarý múmkindigi bar. Aýa raıy ashyq bolyp tursa, egin jınaýdy 10-15 kúnde aıaqtaý múmkindigi bar", dep qorytyndylady.
