Naızatastaǵy tamdy Qunanbaı óz zamanynda qystaq retinde saldyrǵan eken. Ýfadan, Buqaradan oqý-quraldaryn alǵyzyp, balalar qystaı noǵaı muǵalimnen bilim alǵan. Sonda balalaryna shybyq artyq tıip ketpesin dese kerek, Zere ájeleri mektepte meńgerýshi bolyp jumys istepti.
Bul týraly Shyǵys Qazaqstanǵa memlekettik hatshy bastaǵan delegasııanyń ókili retinde kelgen belgili aqyn Ulyqbek Esdáýlet aıtty.
– Eski tamnyń ornyn "Abaı alǵash saýatyn ashqan jer" dep qaıta qalpyna keltirse durys bolar edi. Shákárim jatqan qudyqty da tarıhı nysanǵa aınaldyryp, týrısterdiń nazaryn bursaq, – deıdi Ulyqbek Esdáýlet.
Árıne, oryndy usynysty memleket basshylary qoldaı jatar. Qunanbaı áýletiniń máńgilik mekeni, shejireli Aqshoqyny da keshe ǵana kóldeneń másele etip kótergen edi, kóp uzamaı tarıhı jerge aınaldy. Qaraýsyz qalǵan Qasqa bulaqqa da búgin ótken-ketkender arnaıy toqtap zám-zám sýynan dám tatady, tasqa qashalǵan uly Abaıdyń ǵıbratty sózderin oqıdy. Erteń-aq "Abaıdyń alǵashqy mektebin kóremiz" deýshiler Naızatasqa aǵylyp bara jatar.
Mereı QAINARULY,
Shyǵys Qazaqstan oblysy
