Árıne, turǵyn úı salasynda qabyldanǵan baǵdarlama kóp. Sonyń biri – «Nurly jer». Bıyl osy baǵdarlama sheńberinde óńirde satyp alý quqyǵynsyz 157 páter jalǵa beriledi. Mundaı múmkindik halyqtyń az qamtylǵan toptary men kópbalaly otbasylarǵa arnalyp otyr. Al kredıttik turǵyn úıge 500-ge jýyq turǵyn qol jetkizbek. Bul baǵyttaǵy baspana qurylysyna 5 mlrd teńge qarajat qarastyryldy.
Sondaı-aq «Nurly jer» memlekettik baǵdarlamasy aıasynda 2 paıyzdyq nesıemen beriletin «Baqytty otbasy» baǵdarlamasyn iske asyrý da josparlanǵan. Buǵan respýblıkalyq bıýdjetten 239 turǵyn úı qaryzy úshin 2,4 mlrd teńge bólinedi. Turǵyn úı qurylysy salynyp jatqan aýdandarǵa ınjenerlik-kommýnıkasııalyq ınfraqurylymdy júrgizý úshin 39 jobany iske asyrý kózdelip otyr. Bul maqsatqa 10,3 mlrd teńge qarajat qaralǵan. Sonymen qatar Atyraý oblysynda baspana qurylysy jumystaryna 2 myńǵa jýyq adamdy tartý josparlandy. Jalpy bes aıda 1 467 turǵyn úı paıdalanýǵa berildi. Onyń ishinde 975 jeke úı bar.
Byltyrdan beri óńir ortalyǵyndaǵy apatty turǵyn úıler men jataqhanalardyń turǵyndaryn jańa páterge kóshirý qolǵa alynǵan edi. Máselen, Atyraý qalalyq turǵyn úı-kommýnaldyq sharýashylyǵy bóliminiń sektor meńgerýshisi Rafhat Joldıevtiń deregine súıensek, byltyr A.Qunanbaev, J.Dosmuhambetov kóshelerindegi eki jataqhananyń turǵyndary «Bereke» shaǵyn aýdanyndaǵy jańa úıge kóshirildi. Al bıyl eki apatty úıdiń turǵyndaryna jańa páterlerdiń kilti tabystaldy. Atap aıtqanda, M.Áýezov kóshesinde ornalasqan №22 úıdiń turǵyndaryna «Juldyz» shaǵyn aýdanyndaǵy úıden páter berildi. Al Dostyq kóshesindegi №14 úıdiń turǵyndary «Bereke» shaǵyn aýdanyndaǵy jańa mekenge kóshirildi. Sondaı-aq «Birlik» shaǵyn aýdanyndaǵy ATP-1, ATP-2 meken-jaıyndaǵy apatty dep tanylǵan turǵyn úılerden 32 otbasy «Juldyz» shaǵyn aýdanyna qonys aýdardy.
Endi mine, 30 tamyz – Konstıtýsııa kúni qarsańynda 33 otbasy jańa páterge ıe bolyp otyr. Jańa páterler «Nursaıa» shaǵyn aýdanynda boı kótergen 9 qabatty turǵyn úılerdiń birinen berildi. Baspanaly bolǵandardyń deni – 2013 jyldan beri turǵyn úı kezeginde turǵan kóp balaly otbasylar.
– Bul – «Nurly jer» baǵdarlamasy aıasynda jalǵa berilgen páterler. Atalǵan baǵdarlamamen byltyr 257 otbasy páter alǵan edi. Al bıyl jyl basynan bergi segiz aıda jańa baspana alǵandardyń sany 250 otbasyna jetti, – dedi Atyraý qalalyq turǵyn úı-kommýnaldyq sharýashylyq bóliminiń sektor meńgerýshisi Rafhat Joldıev.
Onyń aıtýynsha, bıyl qonys toıyn toılaıtyn otbasylar qatary arta túspek. Jyl aıaǵyna deıin turǵyn úı kezegindegilermen birge apatty jaǵdaıdaǵy jataqhanalardyń turǵyndaryn da kóshirý kózdelip otyr.
Atyraý oblysy
