Marafonshy qarııa

Ádette sportshylardyń sporttyq ómiri qysqa bolatyny belgili. Degenmen, bul qaǵıdany buzyp, adam organızminiń múmkindigi orasan zor ekenin isimen dáleldep júrgender de joq emes. Biz buǵan deıin soltústikqazaqstandyq gir kóterýshiler – birneshe dúrkin álem chempıo­ny, 10 ret álemdik rekordty jańartyp, 58 jasynda Gınnestiń rekordtar kitabyna engen Vıktor Saıko jáne 63 jasynda Reseıdiń Arhangelsk qalasynda bir mezgilde ótken álem, Eýropa jáne Azııa birinshilikterinde jeńiske jetip, bir ózi 12 medal alyp kelgen Erik Nurpeıisov týraly jazǵan bolatynbyz. Elimizge tanymal marafonshy, sport sheberi, 43 jastaǵy jelaıaq Ásker Qojanov ta respýblıkalyq jáne halyqaralyq marafondar men ýltra marafondardan bir qalyp kórgen emes. Qazybek aǵany da solardyń qataryna jatqyzýǵa bolady.

Búgingi tańda 66 jasty eńsergen Qazy­bek Kákimuly Aqqaıyń aýdanyndaǵy Ara­laǵash aýylynda týǵan. Aldymen aýyl mektebinde bilim alyp, artynan Petro­pavl­daǵy pedagogıkalyq ýchılıshede oqýyn jalǵastyrǵan. Biraq eńbek jolyn mek­tepte emes, sharýashylyqta bastap, Andreevka jáne Amangeldi keń­sha­r­larynda brıgadır bolady.

«Men uldarymdy uıaǵa qondyryp, qyzdarymdy qııaǵa ushyrǵan baqytty janmyn. Ondaǵan nemerem men shóberem bar. Bala-shaǵa erjetken soń densaýlyǵymdy túzeý maqsatynda sportpen aınalysýǵa kiristim. Maqsatyma jetý úshin oblys orta­ly­ǵyndaǵy jeńil atletıka úıirmesine baryp, jastarmen qatar jattyǵa bastadym. Allaǵa shúkir, birneshe jyldan keıin tájirıbeli marafonshylarmen teń dáre­jede nátıje kórsetetin deńgeıge jettim. El aýmaǵynda uıymdastyrylǵan mara­fon­darǵa qatysyp, ózimniń jasymdaǵylar tobynda baǵymdy synaı bastadym. Búgin­ge deıin qol jetkizgen jetistikterime rızamyn. Densaýlyǵym da nyǵaıyp, jyl saıynǵy tumaý men angına sııaqty aýrýlardan birjola qutyldym», deıdi Qazybek Kákimuly.

2014 jyly Reseıdiń Omby qalasynda ótken 21 shaqyrymdyq jartylaı marafonda ol óziniń jasyndaǵylar tobynda ekinshi orynǵa ıe boldy. Bul – jerlesimizdiń eń úzdik nátıjesi. Odan keıingi saıystarda da jaqsy kórsetkishterge qol jetkizip júr. Atap aıtqanda, 5 myń adam qatysqan halyqaralyq «Astana Marathon – 2018» jarysynda 42,2 shaqyrymda 60-69 jas aralyǵyndaǵy sportshylardyń ishinde jerlesimizge ekinshi oryn buıyrdy. Dál sol jyly elordada bıik ǵımaratqa júgi­rip shyǵý boıynsha qaıyrymdylyq sharasy ótken bolatyn. Qatysýshylarǵa 100 metr júgirip, «Highvill» turǵyn úı keshe­niniń 34-qabatyn eńserý qajet boldy. Mara­fonǵa jalpy 326 ótinish tússe, sonyń tek 280-i márege jetti. Erler arasynda eń eg­de qatysýshy bolǵan 64 jastaǵy bizdiń Qazy­bek aǵamyz bul qashyqtyqty 4 mınýt 52 sekýndta eńserip, ekinshi orynǵa ıe bol­dy.

Budan keıin Q.Bekeev mektep bitir­genine 50 jyl tolýyna oraı Nur-Sul­tan men Petropavl qalalarynyń arasyn­daǵy 503,7 shaqyrymdyq qashyqtyqty velosıpedpen júrip ótý josparyna kiristi. Osyǵan deıin tek jeńil atletıkamen aınalysyp kelgen egde jastaǵy adamǵa bul ońaıǵa túspesi anyq edi. Sondyqtan eki aılyq daıyndyqqa kiristi.

«Bul jerdegi maqsatym – ári ózimdi synap, ári qoldarynan smartfondary tús­peıtin oqýshylar men jastarǵa úlgi kór­setý. Árıne oıymdy júzege asyrý qıyn bolatynyn jaqsy túsindim. Sebebi jeńil atletıka bir basqa da, velosport bir basqa dúnıe. Elordada qonaqtap júrgenimde velosporttan Qazaqstannyń eńbek sińirgen jattyqtyrýshysy, búginderi zeınettik demalysta júrgen Vıtalıı Shırıaev degen azamatpen tanystym. Ol meniń oıymdy estip, qoldaıtynyn bildirdi. Mamyr aıy­nan bastap jattyǵýǵa kiristim. Otbasy múshelerim qarsy bolǵanymen, alys jolǵa shyqtym. Sóıtip maqsatymdy júzege asyrdym», deıdi jerlesimiz.

Áńgime barysynda Qazybek Bekeev aldaǵy ýaqytta júzege asyrýǵa nıet tanytyp otyrǵan jobalarymen de bólisti. Ústi­mizdegi jyldyń naýryz aıynan beri koro­na­vırýsqa baılanysty barlyq jarys­tar men buqaralyq sharalardyń toqtatyl­ǵany belgili. Aldaǵy maqsaty – shekara ashylǵan soń velosıpedpen Qazaqstannyń birqatar qalasyn basyp Eýropa elderiniń tas jolyn baǵyndyrý. Qazirgi ýaqytta jerlesimiz alys jolǵa daıyndyq sharalaryna kirisip, demeýshiler izdep júr.

Qanat ATAMANOV,

jýrnalıst

Soltústik Qazaqstan oblysy