"Ǵylym salasyn damytý týraly da aıtqym keledi. Bul máselede bizge tyń kózqaras pen jańa tásilder kerek. Sondaı-aq halyqaralyq tájirıbege arqa súıeýimiz qajet. Úkimetke jyl saıyn álemniń jetekshi ǵylymı ortalyqtarynda 500 ǵalymnyń taǵylymdamadan ótýdi qamtamasyz etýdi, sondaı-aq «Jas ǵalym» jobasy aıasynda zertteý júrgizý úshin 1000 grant bólýdi tapsyramyn", dedi Prezıdent.
Atalǵan salany alǵa jyljytýda kásiporyn ıeleriniń de úlesi bolýy kerektigin ataǵan Q.Toqaev ulttyq deńgeıdegi naqty máselelerdi sheshýde de ǵylymnyń áleýetin paıdalaný kerektigin atap ótti.
"Ǵylymdy qarjylandyrýdyń jáne qoldaýdyń mańyzdy kózi – iri kásiporyndardyń, ásirese, shıkizat salasyndaǵy kompanııalardyń tapqan qarajaty. Tapqan tabystyń 1%-yn ǵylym men tehnologııany damytýǵa berý týraly qoldanystaǵy norma talaptary saqtalmaı otyr. Kóp jaǵdaıda bul qarajat kompanııalardyń ishinde bóliniske túsip ketedi. Úkimetke osy qarajatty jınaqtaý isin ortalyqtandyrýdy jáne ony bıýdjet arqyly jalpyulttyq ǵylymı basymdyqqa saı bólinýin qamtamasyz etýdi tapsyramyn. Iri bıznes ókilderi óńirlik ýnıversıtetterdiń ǵylymı qyzmetin qamqorlyqqa alsa nur ústine nur bolar edi. Bizge elimizde ǵylymdy damytý jónindegi arnaýly baǵdarlamalyq qujat qajet. Onyń basty mindeti – ulttyq deńgeıdegi naqty máselelerdi sheshýde ǵylymnyń áleýetin paıdalaný bolmaq", dedi Memleket basshysy.
