Infografıkany jasaǵan Záýresh Smaǵul, EQ
Prezıdent Qasym-Jomart Toqaevtyń halyqqa arnaǵan Joldaýynda atap kórsetilgendeı, 2023 jyly dárigerlerdiń jalaqysy elimizdegi ortasha jalaqydan 2 ese joǵary bolady. Bıylǵy II jartyjyldyqta pandemııamen kúresken medısına salasynyń mamandaryna kótermeleý retinde qazynadan 150 mlrd teńge qosymsha qarajat bólinedi. Al 2025 jylǵa qaraı elimiz boıynsha 20 zamanaýı medısınalyq ortalyq salynady. Sonymen birge indet kezinde asa qajettilik týdyrǵan epıdemıolog, reanımatolog, pýlmanolog, ınfeksıonıst, kardıolog syndy mamandar daıarlaýǵa kóbirek kóńil bólinbek. Memleket halyqtyń ortasha ómir súrý uzaqtyǵyn 75 jasqa ulǵaıtýdy qolǵa alady. Sonymen qatar shalǵaıdaǵy aýyldarda halyqtyń densaýlyǵyn jaqsartý maqsatynda transporttyq medısınany damytý júzege asyrylady.
Osynaý ıgilikter keleshekte otandyq densaýlyq saqtaý salasyn órge bastyrady degen oıdamyz. Jalpy, medısınanyń ult bolashaǵynda mańyzdy ról oınaıtynyn pandemııa anyq kórsetip berdi. Sondyqtan Prezıdenttiń Joldaýda bul salaǵa aıryqsha toqtalýy eldiń keleshegine degen qamqorlyqty bildiredi.
Gúlnar QURMANBEKOVA,
Shymkent qalalyq jedel járdem stansasynyń bas dárigeri
ShYMKENT
