Memleket basshysy Tótenshe jaǵdaılar mınıstrligin qaıta qurýdy tapsyrdy. Bul ne úshin qajet? «Biz tabıǵı jáne tehnogendik apattar dáýirine aıaq bastyq», dedi Prezıdent.
Qazaqstanda tabıǵı jáne tehnogendik sıpattaǵy tótenshe jaǵdaılardyń aldyn alý jáne olardy joıý; apattan zardap shekken halyqty evakýasııalaý, oǵan shuǵyl medısınalyq jáne psıhologııalyq kómek kórsetý, órt sekildi tilsiz jaýmen kúresý, adamdardy qutqarý sekildi qıyndyǵy ǵalamat, máselesi san-salaly sektorǵa jaýapty memlekettik organ búginde IIM-de bosaǵadan syǵalaǵan jetimniń kúıin keship júrgeni jasyryn emes. Munda salalyq mınıstrlik buryn bolǵan, alaıda ol 2014 jylǵy tamyzda Ishki ister mınıstrligi quramyna Tótenshe jaǵdaılar komıteti bolyp kirdi. Ishki ister organynyń basty maqsaty qylmyskerlermen kúres ekeni málim. Demek, tabıǵı jáne adam qolymen jasalǵan apattarmen arpalysyp, kesir-kesapatyn joıýmen jeke mınıstrliktiń aınalysqany jón. Osynyń durystyǵyna О́zbekstannyń Sardoba sý qoımasy jarylýynan qyzyl sý basqan Túrkistan oblysynyń Maqtaaral aýdanyn aralaǵan kezde kóz jetkizdim.
Joldaýda qoıylǵan mindetke sáıkes sheneýnikter sany kezeń-kezeńmen 25 paıyzǵa azaıtylatyn boldy. Quptarlyq is. Degenmen, bul pandemııa kezinde qashyqtan jumys isteýge kóshirilgen mamandardy avtomatty túrde qysqarta salý esebinen júrgizilmegeni abzal. Qysqartý naýqany biliksiz, óz isine nemquraıdy, halyqtyń tómen baǵasyn alǵan, atyna kóp shaǵym túsetin, tıimdiligi tómen memqyzmetshilerden arylýǵa septeskeni jón. Odan memlekettik qyzmet kórsetý sapasy zardap shekpeýi qajet.
Joldaýda aıtylǵandaı, elimizde Strategııalyq josparlaý jáne reformalar jónindegi agenttik paıda bolady. Ol tikeleı Memleket basshysyna baǵynady. Áıtpese, strategııalyq josparlaýdyń aqsap jatqanyn, reformalardyń da ala-qula ekenin, kóbiniń aıaǵyna deıin jetkizilmeıtinin Májilis talaı synǵa aldy.
Prezıdent tapsyrmasymen «jaýapty hatshylar» ınstıtýty joıylady. Qasym-Jomart Kemeluly ár mınıstrlik pen vedomstvoda jaýapty hatshy laýazymy engizilgende, olar mınıstrlerdi ákimshilik-kadrlyq jumystan bosatady dep kútilgenin, biraq olaı bolmaǵanyn atap ótti.
Jaýapty hatshy laýazymy kezinde komandamen kóship júrý sekildi teris qubylysty toqtatý úshin de engizilgen-tin. О́ıtkeni ol istiń sabaqtastyǵyn jáne memapparattyń turaqtylyǵyn saqtaýdy óz moınyna alýy kerek edi. Mysaly, Úkimet músheleri tolyǵymen otstavkaǵa ketip jatqanda, Jaýapty hatshy ujymmen birge jumysty jalǵastyra berýi tıis-tin. Shynynda, bular jańa basshymen birge búkil ujymnyń aýysýyna toqtaý bola almady. Onyń ústine jaýapty hatshynyń saıası máselelerge aralaspaýy talap etildi. Is júzinde bir máselege qatysty bul ekeýiniń ustanymy men sheshimi ózara qaıshy keletin kezder de ushyrasady. Mınıstrdi de, jaýapty hatshyny da Prezıdent óz Jarlyǵymen taǵaıyndaıtyndyqtan, ekeýiniń jaǵdaıy áý bastan teń. Sondyqtan onyń biri ekinshisine baǵynǵysy kelmeı, olardyń arasynda teketires bolatyn. Endi barlyq suraý bir tulǵadan – Prezıdenttiń ózi taǵaıyndaıtyn mınıstrden bolýy tıis.
El Prezıdenti usynǵan reformalardy júzege asyrý maqsatynda Parlament jyl sońyna deıin memlekettik qyzmet týraly zańnamaǵa túzetýler toptamasyn qabyldaıdy dep josparlanyp otyr.
Baqytbek SMAǴUL,
Májilis depýtaty, Nur Otan fraksııasynyń múshesi
