Memleket basshysy el halqyna «Jańa jaǵdaıdaǵy Qazaqstan: is-qımyl kezeńi» atty Joldaýynda turaqty ekonomıkalyq ósýdi qamtamasyz etý, ómir súrý sapasy men deńgeıin arttyrý boıynsha naqty mindetter qoıdy. Qazaqstan Respýblıkasynyń Ulttyq ekonomıka mınıstrligi bes negizgi baǵyt boıynsha jumys isteıdi: Kásipkerlikti damytý.
Salyq-bıýdjet saıasatyn jetildirý. Investısııalardy yntalandyrý. Teńgerimdelgen óńirlik damý. Memlekettik basqarý. Kásipkerlikti damytý Shaǵyn jáne orta bızneske qosymsha kómek kórsetý maqsatynda shaǵyn jáne orta bıznestiń qazirgi kredıtteri boıynsha paıyzdyq mólsherlemelerdi sýbsıdııalaý júzege asyrylady, ári túpkilikti jyldyq mólsherlemeleri 6%-ǵa deıin jetkiziledi. Sýbsıdııalaý tótenshe jaǵdaı jarııalanǵan kezden bastap 12 aı merzimdi qamtıdy. Bul shara «Bıznestiń jol kartasy-2025» memlekettik baǵdarlamasynyń jańa baǵyty aıasynda iske asyrylady.
«Bıznes ahýaldy odan ári jaqsartý boıynsha sharalar kesheni qabyldanady. Oǵan táýekelderdi basqarý júıesin avtomattandyrý, tıisti komıssııa qurý arqyly barlyq retteýshilik talapty qaıta qaraý jáne olardy azaıtý boıynsha usynystar ázirleý kiredi. Kásipkerlik kodekske tıisti ózgerister engizý arqyly retteýshilik apellıasııa ınstıtýtyn engizý boıynsha sharalar qabyldanady», — dep málimdedi Rýslan Dálenov.
Sondaı-aq qarjylaı jáne qarjylaı emes memlekettik qoldaý sharalaryn iske asyrý jalǵasady. Tutastaı alǵanda bul 2025 jylǵa qaraı shaǵyn jáne orta bıznestiń jalpy ishki ónimdegi úlesin 35%-ǵa deıin, shaǵyn jáne orta bızneste jumyspen qamtylǵandar sanyn 4 mıllıon adamǵa deıin ulǵaıtý boıynsha qoıylǵan mindetterge qol jetkizýge yqpal etedi.
Salyq-bıýdjet saıasatyn jetildirý Búgingi kúni Salyq kodeksinde 12 salyq, 48 kishi salyq túri, 10 tólemaqy jáne 6 alym kózdelgen. Tıisinshe, salyqtar men tólemder sanyn barynsha azaıtý boıynsha jumys júrgiziledi. Ekonomıkanyń asa kóp zardap shekken sektorlary úshin balamaly negizde aınalymnan bólshek saýda salyǵyn tóleý quqyǵyn qoldaný máselesi zerdelenedi. Sondaı-aq salyq mólsherlemelerin saralaý múmkidikteri qaralady. Bıýdjettiń túıindi koeffısentteri jıyntyǵy ázirlenip, bıýdjet saıasatynyń tıimdiligi men turaqtylyǵyn baǵalaý engiziledi. «Keńeıtilgen bıýdjetti» engizý sheńberinde shoǵyrlandyrylǵan bıýdjetke bıýdjetten tys qorlardy qosý arqyly memlekettik qarjyny keshendi baǵalaý engiziledi.
Investısııalardy yntalandyrý Investısııalyq jobalardy iske asyrýdyń barlyq merzimine zańnamalyq talaptardyń turaqtylyǵyn qamtamasyz etý maqsatynda Strategııalyq ınvestısııalyq kelisimder engiziledi. Osy maqsatta Kásipkerlik jáne Salyq kodeksterine, sondaı-aq «Arnaıy ekonomıkalyq aımaqtar týraly» zańǵa túzetýler qarastyrylady. Strategııalyq ınvestısııalyq jobalar pýly qalyptastyrylady. Barlyq joba Investısııalardy tartý jónindegi úılestirý keńesinde qaralady. Jobalardyń iske asyrylý tıimdiligin arttyrý úshin árbir iri ınvestordy jeke tásilmen qamtamasyz etý boljanady. Investısııalyq jobalardy iske asyrý prosesinde zamanaýı ınfraqurylymdy, aǵylshyn zańnamasyn jáne jeńildetilgen salyq jáne kóshi-qon rejımin usynatyn «Astana» halyqaralyq qarjy ortalyǵynyń áleýeti belsendi paıdalanylady.
Teńgerimdelgen óńirlik damý Elimizdiń óńirlik damýyna árbir naqty óńirdiń básekelestik artyqshylyǵyn kórsetý jónindegi sharalardy qamtıtyn jańa tásilder ázirlenedi. Bul úshin 2030 jylǵa deıingi aýmaqtyq-keńistiktik damýdyń boljamdy shemasyna tıisti ózgerister engiziledi. Aýyldardaǵy ózekti ınfraqurylymdyq máselelerdi sheshýge baǵyttalǵan «Aýyl el besigi» jobasyn belsendi iske asyrý jalǵasady. Jergilikti ózin-ózi basqarýdy jetildirý sheńberinde aýyl okrýgteri bıýdjetiniń qarjylyq múmkindikteri keńeıtiledi (salyqtar men tólemderdiń tórt túri beriledi). Jergilikti ózin-ózi basqarýdy damytýdyń jańa tujyrymdamasy ázirlenedi. Bul Tujyrymdama sheńberinde aýyl ákimderin tikeleı saılaýdy engizý, jergilikti memlekettik basqarýdyń múliktik quqyqtaryn jáne máslıhattardyń ókilettikterin keńeıtý boıynsha usynystar daıyndalady.
Memlekettik basqarý Memlekettik apparatty jáne kvazımemlekettik sektor jumyskerlerin qysqartý sheńberinde 2020 jyly olardyń sany 10%-ǵa, kelesi jyly taǵy 15%-ǵa qysqarady. Kásipkerlikti qoldaý sheńberinde memleket pen kvazımemlekettik sektordaǵy jyljymaıtyn múlik obektileri boıynsha shaǵyn jáne orta bıznes úshin jaldaý tólemaqysyn esepteý jyl sońyna deıin toqtatylady. Ekonomıkany odan ári memleket ıeliginen shyǵarý úshin 2025 jylǵa deıin jekeshelendirýdiń jańa jospary qabyldanady.
