Dala kemelerinde damyl joq

Shildede bastalǵan aptap ystyqtan astyq tez jetildi. Sondyqtan oblysta oraq naýqany jyldaǵydan erte bas­taldy. Jer yryzdyǵyn jınap alýǵa dıqandar áý basta qarqyndy kirisip edi, ókinishke qaraı, bir apta boıy jaýǵan jańbyr kedergi bolyp, tehnıka toqtap qaldy. Alaıda tamyzdyń sońy tamyljyǵan shýaqqa ulasyp, on shaqty kúndeı turyp qalǵan dala kemeleri dándi alqapqa qaıta shyqqan. Aýyl sharýashylyǵy basqarmasynyń málimetinshe, óńirde búginge deıin 700 myń gektardan astam bı­daı alqaby orylyp alynǵan. Ázir­ge bıdaı túsimi orta eseppen gektaryna 10 sentnerden aına­lýda.

Oraqtyń aldyn ádettegideı oblystyń ońtústik aýdandary bas­tap keledi. Máselen, Áýlıe­kól aýdanynyń dıqandary al­qap­taǵy bıdaıdyń 30 paıyzǵa jýyǵyn bastyryp úlgergen.

Sońǵy birneshe jyl boıy jer­den ónim ala almaı shy­ǵynǵa batyp, qaryzy kóbeıgen Naýyr­zym aýdanynyń dıqandaryna bıyl tabıǵat jomart syńaı tanytyp turǵan sııaqty. Aýdanda 242 myń gektar alqapqa dándi da­qyl egilgen. Onyń 241 my­ńyn bıd­aı, 19 myńyn arpa,
9 myń­ǵa jýyǵyn maıly daqyl alyp jatyr.

– Jańbyr jaýyp 1-2 apta­daı turyp qaldyq. Odan keıin, mine, bir jetiden beri oraq qyzyp tur. Barlyq sharýashylyqtar alqapta. Byltyr qýańshylyq saldarynan bıdaı túsimi gektaryna nebári 3,2 sentner bolǵan. Bıyl orta eseppen ár gektardan 7 sentner bıdaı alýdy kózdep otyrmyz. Biraq ónim budan da joǵary bolýy múmkin. 3400 tonna jaǵarmaı qory bar. Bári alyp jatyr. Aldygúni Dámdi jaqta boldym, keshe aýdan ákimimen Býrevestnıkte bolyp qaıttyq. Oraq naýqany qarqyndy júrip jatyr. Aýa raıy osy qalpynan aınymasa, astyqty belgilengen merzim ishinde shashaýsyz jınap alamyz, – dedi aýdan ákiminiń orynbasary Qabıdolla Omarov.

Degenmen, Qostanaı asty­ǵy­nyń negizgi qoryn soltústik aýdandar beredi. Bul óńirdegi iri sha­rýashylyqtardyń biri – «Qar­qyn» agrofırmasy. Seriktestik basshysynyń só­zinshe, búginge deıin sharýa­shy­lyq astyqtyń teń jartysyn jınap alǵan.

Jalpy, bıyl Qostanaı ob­lysy daqyldardy ártarap­tandyrý boıynsha joǵarǵy kórsetkishke qol jetkizip otyr. Ob­lystaǵy maı­ly daqyl kólemi ótken jyl­ǵydan 130,4 myń gek­tarǵa artyq. Alqaptardy árta­raptandyrý sheńberinde óńirde soń­ǵy 4 jyl ishinde maıly da­qyldar alqaby 289,1 myń gektarǵa ulǵaıǵan.

Búginde oblystyń egin al­qap­­tarynda 9 myńnan astam kom­baın tolassyz jumys istep jatyr.

Qostanaı oblysy