Qoǵamdyq baqylaýǵa kóńil bólgeni qýantty

Búginde memlekettik basqarý isindegi eń ózekti problema sybaılas jemqor­lyq ekeni eshkimge jasyryn emes. Osy jemqorlyqtyń saldarynan qazynanyń qyrýar qarjysy ustaǵannyń qolynda ketip, josparlanǵan kóp sharýalar júzege aspaı, assa da sapasy syn kóter­meı jatqan jaıy bar. Bul rette Prezı­dent sybaılas jemqorlyqtyń aldyn alýǵa basymdyq bere otyryp, bul iste qoǵamdyq baqylaýdyń róli erekshe ekenine toqtaldy.

«Sybaılas jemqorlyqpen kúres barynsha júıeli sıpat alýda. Jemqor­lyqtyń paıda bolý sebepterine kóbirek nazar aýdarylyp, aldyn alý jumystary júrgizilýde. Endi, jemqorlyqqa aparatyn faktorlardy anyqtaý úshin memlekettik organdar men kvazımemlekettik sektordyń normatıvtik aktilermen jumys úderisine jemqorlyqqa qarsy kúres turǵysynan arnaıy taldaý júrgizgen jón», dedi Prezıdent.

Prezıdenttiń bul rette sybaılas jemqorlyqpen kúres memlekettik appa­ratta negizsiz jaltaqtyq pen bastama­shyldyqtan qashqaqtaýǵa sebep bolmaýy keregin de atap ótti.

«Sybaılas jemqorlyqpen kúres jaýapqa tartýdan qoryqqan sheneýnikterdi derbestik, bastamashyldyq jáne jedel áreket etý qaterinen aıyrmaýǵa tıis. Biz memlekettik baqylaýǵa balama retinde qoǵamdyq baqylaý ınstıtýtyn qoldaı otyryp, tıisti quqyqtyq negiz qalyptastyrýymyz kerek», dedi ol.

Osyǵan baılanysty memlekettik organdardyń, kvazımemlekettik sektor­dyń qoǵam aldyndaǵy ashyqtyǵyn jáne eseptiligin qamtamasyz etýge jol ashatyn qoǵamdyq baqylaý týraly zańdy ázirlep, qabyldaýdy tapsyrdy.

«Qoǵamdyq keńesterdiń rólin arttyra túsý kerek. Olardy satyp alýdy uıymdastyratyn komıssııalardyń jumy­syna tartý qajet. Sondaı-aq kvazı­memlekettik sektorda qoǵamdyq keńes qurý múmkindigin qarastyrý kerek. Parlament qaralymyndaǵy tıisti zań jobasyn jyl aıaǵyna deıin qabyldaǵan jón. Sonymen qatar qoǵamdyq keńesterdiń quramyna túrli áleýmettik top ókilderin keńinen tartý kerek. Mysaly, biz múmkindigi shekteýli adamdar osyndaı uıymdardyń jumysyna aralasyp, óz únderin jetkizý úshin qolaıly jaǵdaı jasaýymyz qajet. Olar árqashan memlekettiń erekshe nazarynda bolýǵa tıis», dedi Q.Toqaev.

Prezıdenttiń bul bastamasy eń aldymen jemqorlyqtyń saldarymen emes, ony týǵyzatyn sebepterdi erte anyq­tap, memleket damýyn tejeıtin jegi qurt­ty erte joıýdy kózdeıdi. Árıne, bul aı­tyl­ǵandardy júzege asyrýda ár­bir qazaq­standyqtyń, azamattyq qoǵam ıns­tı­týttarynyń de belsendiligi aýadaı qajet.

Darhan MUHAN,

jýrnalıst, Jezqazǵan qalasy qoǵamdyq keńesiniń múshesi

Qaraǵandy oblysy