Elektrondy qurylǵy da bar, oqýlyq ta túgel

О́ńirde jańa oqý jylyna daıyndyq erte bastalyp, salanyń kem-ketigi túgendelip, ony retke keltirý sát saıyn tııanaqtalyp otyrdy. Osyndaı júıeli istiń nátıjesinde qazirgi ýaqyt talabyna saı onlaın oqý úshin oqýshylardy elektrondy qurylǵylarmen qamtamasyz etýge basa nazar aýdaryldy. Qashyqtan oqıtyn 116 254 oqý­shy­nyń 66 paıyzynyń elektrondy qurylǵylary bar ekeni anyqtalyp, mundaı múmkindigi joq oqýshylardy kompıýter, planshettermen qamtý ju­mystary júrgizildi. Osy istiń aıasynda mektepter teńgerimindegi 14 203 kompıýter oqýshylarǵa ýaqytsha paıdalanýǵa berilip, saladaǵy únemdelgen qarjy esebinen 2 635 planshet alyndy. Qalǵan balalarǵa Úkimet rezervi esebinen beriletin 22 870 kompıýterlik tehnıka 20 qyrkúıekke deıin taratylady. Sonymen qatar «Mektepke jol» aksııasy aıasynda áleýmettik jaǵ­daıy tómen otbasynan shyq­qan 1116 oqýshyǵa noýtbýkter men planshetter taratyldy.

 Oblysta 20 259 muǵalim bar. Qashyqtan oqytýǵa qajetti quryl­ǵylardy alyp berýde de­meýshiler esebinen 306 pedagog­ke noýtbýk tabystaldy.

Esep boıynsha jańa oqý jylynda 293 mektepte 169 173 oqý­shy oqıdy. Onyń ishinde 18 423 bala 1-synyp tabaldyryǵyn attap otyr. Bilim jáne ǵylym mınıstrliginiń mekteptegi oqý prosesin uıymdastyrý jónindegi baǵytyna sáıkes 116 592 oqýshy qashyqtan oqytylady. Ol BilimLand, Daryn-onlaın ınternet platformalary arqyly júrgizilmek. Al 1-4-synyptaǵy 41 547 oqýshy dástúrli júıe bo­ıynsha bilim alady. Internet ıgiligi jete qoımaǵan shalǵaı eldi mekenderdegi 73 mektepte 11 004 bala da oflaın oqıtyn boldy. Mektepke kelip bilim ala­tyn balalardyń qaýipsizdigi úshin sanıtarlyq talaptar qa­tań saqtalady. Oqýshylar 5 satydan turatyn dezınfeksııadan ótedi. Synyptardyń aýasyn ta­zartý, kvarstaý, dezın­fek­sııa­lyq-ylǵaldy jýyp tazalaý qa­daǵalaýǵa alynady. Osy sanı­tarlyq sharalarǵa 182 mln teńge baǵyttalyp otyr.

Árıne, onlaın oqýdyń da áıteýir bir aıaqtalyp, balalardyń mektepke oralatyny anyq. Son­dyqtan da mektepterdi jańa ta­laptarǵa beıimdeý, balalardyń qaýipsizdigin qamtamasyz etý umyt qalmaýy tıis. Bıyl osy maq­­satta bilim oryndaryn beı­ne­kameralarmen qamtý úshin oblystyq bıýdjetten 250 mln teńge qarjy bólinip, alǵashqy lekte 70 mektepke beınekameralar ornatyldy. Alda da bul másele kezeń-kezeńimen sheshi­letin bolady. Sonymen qatar bala qaýipsizdigi úshin salaaralyq is-sharalar jospary bekitildi. 

Jańa oqý jylyna oqýlyqtar men oqý-ádistemelik keshender satyp alýǵa jergilikti bıýdjetten 1,2 mlrd teńge bólinip, kerekti oqýlyqtar túgel jetkizildi.

Qyzylorda oblysy