Ýaqyt alǵa ozǵan saıyn keıbir mamandyqtardyń kádege aspaı qalatyny da aıtylyp júr. Buryn elektr jelisi salasynda táp-táýir jumys istep júrgen Rınat Gızzatýllınniń kóńili osydan tórt jyl buryn qaz ósirýge aýdy. Shynyn aıtqanda, buryn úıde on-on bes qaz ustaǵanymen, bul oraıdaǵy sharýanyń uńǵyl-shuńǵylyn baıyptap, zerttep kórmepti. Sondyqtan áýeli osy bıznespen aınalysyp júrgen adamdardan syr tartqan, tájirıbe almasqan. Kirisi men shyǵysyn eseptegen. Sodan soń baryp birjola bel býǵan. О́ıtkeni qaz eti tańsyq taǵam sanatynda. Eti de, jumyrtqasy da, tipti mamyǵy da suranysqa ıe. Baǵymy da asa qıyn emes. Ras, balapan kezinde kózden tasa qylmaý kerek. Bir-eki aıdyń ishinde ósip-jetilgen soń baqtashyny qajet etpeıdi. Sýy men jemi bolsa bolǵany.
Qaz baǵatyn fermerdiń tynys-tirshiligin bas kómekshisi Rımma Abdýllaqyzy taratyp aıtyp berdi. Aldymen qajetti jer telimin alsa kerek. Az ýaqyttyń ishinde qus qorasyn, eki qoımany, ınkýbatorǵa qajetti baspanany salyp alǵan. Bashqurtstannan qaz jumyrtqasy jetkizilgen. Tirnektep júrip gollandııalyq «Lında» qazdaryn myń basqa jetkizgen. Aldaǵy ýaqytta áli de múmkindigine oraı kóbeıte bermekshi. Qazdyń bul tuqymy kúı talǵamaıdy. Tez ósip jetiledi, ózge qaz tuqymdaryna qaraǵanda etti de kóp beredi.
Rınattyń bıznestegi alǵashqy qadamyna memleket tarapynan kómek kórsetilgen eken. «Atameken» óńirlik kásipkerler palatasy mamandarynyń kómegimen tıisti daıyndyqtan ótipti.
– Bıznes josparyn sátti qorǵady. Jyldyq 6 paıyzdyq ósimmen 4 mln teńge nesıe aldy, – deıdi aýyldyq okrýg ákimi Oralbek Bekishev, – men óz tarapymnan qaz fermasynyń okrýg turǵyndaryna óte paıdaly ekenin basa aıtqym keledi. Birinshiden, onyń ónimi ekologııalyq jaǵynan taza, dıetalyq qus eti ári aýyldastaryn jumyrtqamen qamtamasyz etip otyr. Oblys ortalyǵyndaǵy bazarlardaǵy baǵadan 15 paıyzǵa arzan. Ol aýyldyq jerde de adal eńbegimen kásip ashýǵa bolatynyn kórsetip, jol bastap otyr.
О́tken jyly qus fermasy 800 qaz satypty. Semiz ári taza et birden ótip ketse kerek. Baǵasyna kásipker de, satyp alýshylar da razy.
Aqmola oblysy,
Zerendi aýdany
