Parlament • 04 Qyrkúıek, 2020

Máýlen Áshimbaev qos palataly Parlamenttiń qajettigi týraly aıtty

45 ret kórsetildi

Senat Tóraǵasy Máýlen Áshimbaev qos palataly zań shyǵarý organynyń qajettigi nazar aýdaryp, partııalyq múddeler men óńirlerdiń ókilettigi Parlamentte teńesetinin aıtty, - dep habarlaıdy Egemen.kz.

"Habar 24" telearnasynyń efırinde Senat Tóraǵasyna qos palataly Parlamentti saqtaý qajettigi jáne Joǵarǵy Palataǵa saılaý tetikteriniń mańyzy týraly suraq qoıyldy. Máýlen Áshimbaev saıası júıeni damytý jáne sapaly zańdar qabyldaý, memlekettiń strategııalyq múddelerin qorǵaý, sondaı-aq zań shyǵarý úderisinde barlyq áleýmettik toptar men aımaqtardyń pikirlerin eskerý turǵysynda qazirgi qoldanystaǵy júıe meılinshe durys ekenin aıtty. Tóraǵa eki Palatanyń quramy qalaı qurylatynyn túsindirip, Senatta partııalyq jáne aımaqtyq múddeler teńeletinin atap ótti.

"Májilis – bul saıası partııalar qatysatyn saılaý qorytyndysy boıynsha qurylatyn palata. Partııalar óz tizimderin ıdeologııalyq kózqarastarǵa, saıası maqsattar men baǵdarlamalarǵa sáıkes túzedi. Senatqa óńirlerdiń ókilderi saılanady. Bul jerde depýtattardyń úshten ekisi óńirlerdiń ókilderi bolyp tabylady. Senatqa máslıhattar arqyly bizdiń barlyq oblystarymyzdyń, astanamyzdyń, Almaty, Shymkent qalalarynyń ókilderi saılanady. Olar, eń aldymen, óz aımaǵynan ókildik etedi, sol aımaqtyń múddeleri týraly aıtady. Osylaısha, Parlamentte partııalyq múddeler men óńirlik ýákildik teńesedi", – dedi Máýlen Áshimbaev.

Senat Tóraǵasy Májilis pen Senattyń zań jobalaryn qaraý kezinde saıası partııalardyń da, óńirlerdiń de múddeleri eskeriletinin, sondyqtan zańdar muqııat pysyqtalyp, sapasy arta túsetinin aıtty. Qos palataly parlamentter búginde tek Qazaqstanda ǵana emes jáne tek federatıvti memleketterde emes, barshaǵa ortaq bolyp otyr. Eki palataly parlamentter Fransııada, Polshada, Chehııada jáne basqa ýnıtarly memleketterde jumys isteıdi. Senat depýtattaryn máslıhattar arqyly saılaýǵa keletin bolsaq, Máýlen Áshimbaev olardy zańdy dep atady. Ol sondaı-aq birqatar damyǵan demokratııalyq elderde tipti memleket basshylary janama saılaý quqyǵy arqyly saılanatynyn eske saldy.

"Bizde keı kezde keıbir sátterdi synǵa alyp jatady. Degenmen, demokratııalyq prosester turǵysynan úlgi retinde AQSh-ty qarastyrýdy ádetke aınaldyryp alǵanymyz belgili. Búginde AQSh Prezıdentin saılaýshylar saılaıdy. Ár shtatta saılaýshylardyń belgili bir sany bar jáne olar shtat halqynyń pikirin eskere otyryp, Prezıdent úshin daýys beredi", – dedi Máýlen Áshimbaev.

Sonymen qatar Senat Tóraǵasy Parlament depýtattarynyń jańa sessııa barysynda ne isteıtini týraly da aıtyp berdi.

"Eń aldymen, bizdiń mindetimiz – tıisti quqyqtyq bazany qamtamasyz etý, Memleket basshysynyń Joldaýynda aıtylǵan barlyq mejeler men usynystardy iske asyrý úshin qajetti zańdar qabyldaý. Joldaý – keshendi ári júıeli qujat. Onda bizdiń memleketimizdiń tynys-tirshiliginiń kóptegen salalary qamtylǵan jáne árbir sala boıynsha asa mańyzdy zańdardy qabyldaý qajet", – dedi Máýlen Áshimbaev.

Sońǵy jańalyqtar

Qazaqstanda dollar qymbattady

Ekonomıka • Keshe

Uqsas jańalyqtar