«Biz áleýmettik medısınalyq saqtandyrý qoryna kelip túsken ótinishterge taldaý jasadyq jáne azamattardyń saqtandyrylǵan mártebesiniń bolmaýynyń negizgi sebepterin anyqtadyq. Qazaqstandyqtardyń bir bóligi qatań karantın men tótenshe jaǵdaı kezinde MÁMS júıesine jarna tóleý múmkindiginen aıyryldy. Olardyń medısınalyq kómekke qol jetkizýine qoldaý qajet boldy. Qor Densaýlyq saqtaý mınıstrligi men Úkimet qoldaǵan osyndaı usynystardy ázirledi», dedi Áleýmettik medısınalyq saqtandyrý qorynyń basqarma tóraǵasy Bolat Tókejanov.
Taldaý kórsetkendeı, «saqtandyrylǵan» mártebesi bolmaýynyń negizgi sebebi 42,5 myń teńge mólsherinde birjolǵy áleýmettik tólem alý úshin jeńildikti sanattaǵy ókildermen BJT tólenýi boldy. Osyǵan baılanysty aqparattyq júıeler olardy avtomatty túrde BJT tóleýshiler sanatyna aýystyrdy. Tıisinshe olar Saqtandyry bazasynda jeńildetilgen sanattardan «shyǵaryldy». Sondaı-aq tótenshe jaǵdaı kezinde tólemderinde úzilister týyndaǵan jaldamaly qyzmetkerler, jeke kásipkerler, jeke praktıkamen aınalysatyn tulǵalar MÁMS júıesinen tys qaldy.
Osyǵan baılanysty, Úkimet kelesi sharalardy qoldady:
- jaldamaly qyzmetkerler sońǵy 3 aıda keminde 1 tólem bolǵan kezde jáne eger tólemder boıynsha bereshek jyl basynan beri 2 aıdan aspasa, MÁMS júıesinde qalpyna keltiriledi;
- jeke kásipkerler, jeke praktıkamen aınalysatyn adamdar, sondaı-aq sońǵy 3 aıda tólem bolǵan jaǵdaıda, jyl basynan bastap 2 aıdan aspaıtyn bereshegi barlar (memlekettik kirister komıtetiniń resmı aqparatyna sáıkes, olar qyzmetin toqtatqan jaǵdaıda) saqtandyrylǵan adamdardyń mártebesin alady;
- TJ kezeńinde jeńildik sanatymen BJT tólegenderdiń tólemi esepke alynbaıdy jáne saqtandyrý mártebesi avtomatty túrde qaıtarylady;
- COVID-19-ǵa qarsy kúres sheńberindegi shekteý is-sharalaryna baılanysty qyzmetkerlerdiń májbúrli demalystarda kútimsiz bolǵan kezeńderi bereshek retinde esepke alynbaıdy. Bul rette tabysty joǵaltýdyń dáleli tabystyń joǵalýyna baılanysty birjolǵy áleýmettik tólem alý bolyp tabylady (42500 teńge).
«Bul sharalar medısınalyq saqtandyrý júıesine 740 myńǵa jýyq adamdy qaıtardy. Bul sanattardy qosý jumystary áli de júrgizilýde jáne Úkimet is-sharalary arqyly saqtandyrylǵandar sany áli de arta túsedi. Osylaısha koronavırýstyq pandemııaǵa baılanysty tabysynan aıyrylǵan nemese benefısıarlardyń arasynan shyqqan azamattar medısınalyq saqtandyrý júıesine qaıtarylady jáne medısınalyq kómektiń barlyq kólemin ala alady», dedi qor basshysy.
Mártebeni alý úshin azamattarǵa qandaı-da bir jerge barýdyń qajeti joq. Barlyq derekter aqparattyq júıelerde avtomatty túrde jańartylady. Sondaı-aq qor ýákiletti mınıstrliktermen birlesip, 2020 jyldyń 1 qazanyna deıin MÁMS jarnalary men aýdarymdarynan bosatylǵan ShOB-tyń saqtandyrylǵan qyzmetkerlerine mártebe berý boıynsha jumys júrgizýde. Bul 800 myńnan astam jumyskerge áser etedi.
Saqtandyrý mártebesi boıynsha suraqtar týyndaǵan jaǵdaıda, Play Market jáne App Store-da ornatýǵa bolatyn Qoldau 24/7 mobıldi qosymshasy arqyly Áleýmettik medısınalyq saqtandyrý qoryna júginý qajet.
