Qoǵam • 07 Qyrkúıek, 2020

Aýylǵa 6 mıllıonnyń ájethanasy qajet pe?

219 ret kórsetildi

Katonqaraǵaı aýdanynyń Berel aýylyna qoıylǵan sanıtarlyq-gıgıenalyq torapty dárethana halyq arasynda ártúrli pikir týǵyzyp jatyr. Daýly pikirge ózek bolǵan negizgi másele – dárethananyń qunynda. Eki kabınaly dárethana baǵasy 6 mln teńgege jýyq. Shekaraǵa taıaý aýyldardaǵy eńseli úıdiń ózi 6 mln teńge turmaǵan soń turǵyndardyń kúmánmen qaraýy da qısyndy.

Prezıdenttiń de «Úkimetke qaǵazbastylyq pen bıýrokratııaǵa salynbaı, Sybaılas jemqor­lyqqa qarsy is-qımyl agenttigi bergen usynystardy bir aı mer­zimde jan-jaqty pysyqtaýdy tap­sy­ramyn. Sonyń nátıjesi boıyn­sha naqty sharalar kesheni jasa­lýǵa tıis. Negizgi maqsat – jemqorlyqtyń tamyryna balta shabý, ony túbegeıli joıý» degeni bar emes pe?!

Áleýmettik jelide pikir qal­dy­rý­shylardyń arasynda «bar­maq basty, kóz qysty joq pa?» degendeı saýaldar kezdesken soń biz de óz tarapymyzdan máseleniń anyq-qanyǵyna kóz jetkizbek boldyq.

– Mundaı ájethana salǵansha Aq­qaınar, Qyzyl juldyz, Qa­ıyń­­dy aýyldaryna jol salynsa, Berel mýzeıiniń tusynan Buq­­tyr­­maǵa aspaly kópir tartyl­sa, týrıs­­ter úshin áldeqaıda tıim­di bolar edi, – deıdi qoǵam belsen­disi, jýrnalıst Daryn Nursaparov.

Árıne Buqtyrmanyń oń jaǵa­laýyn­daǵy joldyń respýblıka­lyq mańyzy bolmaǵan soń asfalt tóselmegeni ras, tóselýi de ekitalaı.

Daýdyń basy ájethana qury­ly­syna jaýapty mekeme­de bolsa kerek dep, «Jarma Qurylys Gaz» JShS basshylyǵyna habarlasqan edik. Katonqaraǵaı aýdanyndaǵy ájethanalardyń jumysymen aınalysyp júrgen atalǵan mekeme basshysy Vıktor Isabaevtyń aıtýynsha, tek dárethana quny 3 mln teńgeniń tóńireginde.

– Jiliktep aıtar bolsam, kabınanyń ishinde sý jylytýǵa arnalǵan boılery, eki ýnıtazy, qol jýǵyshtary bar. Edeni shirimeýi úshin alıýmınııden tóselgen. Barlyǵy da sapaly. Al qalǵan qarjy smeta qujattaryna sáıkes tıisti jerine jetkizilýine, ornatylýyna jumsalady. Onyń ishinde jumysshylardyń eńbegi, ekskavator syndy tehnıkalardyń qyzmeti bar, – dep túsindirdi V.Isabaev.

«Kazakh Tourism» ulttyq kompa­nııasy» aksıonerlik qoǵa­my qyz­metkerleri: «Shyǵys Qazaq­stan oblysynyń 8 aýdanyna res­pýb­lıkalyq bıýdjetten 104 mln teńge bólý arqyly 17 sanıtarlyq-gıgıenalyq torap (SGT) ornatý josparlanǵan. Búginge deıin 5 SGT ornatylyp, paıdalanýǵa berý úshin elektr jelisin jetkizý kútilýde. Bul pa­vılondardy bıyl 10 qyr­kúıekte elektr jelisine qosý jos­parlanǵan» deıdi.

Ázirshe sanıtarlyq-gıgıe­na­lyq torap Katonqaraǵaı aýda­­ny­­nyń Prımorsk aýy­lyn­­­­daǵy jaǵajaıǵa, Úl­ken N­a­ryn aýylyndaǵy «ZNP» ja­­nar-jaǵarmaı quıý stan­sasy­nyń janyna, respýblıkalyq kúre jol­dan Sógir aýylyna bury­lys­ta, B­erel aýylyna jáne Berel qo­ryq-mu­rajaıy jaqqa ornatyldy.

– Berel aýyl bolǵanmen, bul jaqqa bergisi batysymyzdan, arǵysy shetelden týrıster kóp keledi. Meıli shetel, meıli ózi­miz­diń týrıster kelsin, sanı­tar­lyq-gıgıenalyq toraptyń bol­ǵany durys. Salynǵan ájet­hanalar qaraýsyz qalmaıdy. Ol jaǵyn oılastyryp qoıdyq. Al oblys ortalyǵynan Berelge deıin jol saırap jatyr, – deıdi Katonqaraǵaı aýdanynyń ákimi Renat Qurmambaev.

Saıyp kelgende dál osyndaı zamanaýı jyly dárethanalar Katonqaraǵaı aýdanyna ǵana qoıylmaıdy. Oblystyq týrızm jáne syrtqy baılanystar bas­qarmasy mamandarynyń aı­týynsha, «Jumyspen qamtýdyń jol kartasy-2020» baǵdarlamasy aıasyn­da Alakól demalys aıma­ǵy men Abaı aýdanyndaǵy Qońyr­­áýlıe úńgiriniń mańyna, Sibe kólindegi mýnısıpal­dy jaǵajaıǵa, Glýbokoe aýdanyn­daǵy «Altaı Alpisi» taý shańǵy­sy kýrortyna jáne Tarbaǵataı aýdanyndaǵy Yrǵyzbaı ata es­kertkishiniń janyna da qoıy­lady. Jalpy sany týrıstik rek­rea­sııalyq aýmaqtarǵa 17 dá­ret­hana salý qolǵa alynǵan.

 

Shyǵys Qazaqstan oblysy

 

Sońǵy jańalyqtar

Qur aýlaımyn dep quryqtaldy

Aımaqtar • Keshe

Almatyda jer silkindi

Qazaqstan • Keshe

Elengen erlik

Aımaqtar • Keshe

Uqsas jańalyqtar