Shilde aıynda medısınalyq saqtandyrý júıesindegi jeńildik kezeńi aıaqtalǵannan keıin, medısınalyq uıymdardyń qyzmet kórsetýden bas tartatyny týraly, tipti Qazaqstanda turatyn árbir adamǵa qoljetimdi, tegin medısınalyq kómektiń kepildik berilgen paketine kiretin medısınalyq kómekterdi alýǵa kedergi kóp ekeni týraly turǵyndar tarapynan shaǵymdar jıilep ketti.
Sondyqtan Áleýmettik medısınalyq saqtandyrý qory tirkeý orny mamandary men medısına qyzmetkerleriniń medısınalyq saqtandyrý júıesi, MÁMS pen TMKKK paketine kiretin medısınalyq qyzmetter, medısınalyq kómek kórsetý standarttary, sondaı-aq pasıentterdiń saqtandyrylý mártebesi týraly bilimderin tekserý, medısına uıymdaryna monıtorıng júrgizý bastamasyn kóterdi. Aksııa barysynda Nur-Sultan qalalyq fılıalynyń arnaıy daıyndalǵan sarapshylary medısına uıymdaryna «qupııa pasıent» retinde qońyraý shalyp, osy arqyly medısına uıymdary qyzmetkerleriniń biliktiligin tekserdi. Qordyń Nur-Sultan qalasy boıynsha medısınalyq qyzmet jetkizýshileri arasynda 35 bastapqy medısınalyq-sanıtarlyq kómek kórsetýshiler bar. Zertteý nátıjesinde «Intertıch» otbasylyq-dárigerlik ambýlatorııasy men №1 qalalyq emhana ShJQ-daǵy MKK medısına qyzmetkerleri (95%) eń joǵary bilim deńgeıin kórsetti.
Biraq keıbir medısınalyq qyzmet jetkizýshiler nátıjesi kóńil kónshitpeıdi. Mysaly, «Sana Vita Clinic» JShS men №7 qalalyq emhana ShJQ-daǵy MKK-da telefonmen qyzmet kórsetý deńgeıi nashar bolǵandyqtan, nátıje kórsetkishi 21%-dy qurady.
Qor úshin pasıentterge qajetti medısınalyq qyzmet kórsetýden zańsyz bas tartý áreketterin azaıtý, medısınalyq uıymdardaǵy meısınalyq qyzmet kórsetý sapasyn arttyrý, pasıentterdi tolyqqandy keńestermen qamtamasyz etý mańyzdy. «Qupııa pasıent» aksııasynyń nátıjeleri medısına qyzmetkerleriniń bilimi men medısınalyq qyzmet kórsetý sapasyn arttyrýdaǵy qajetti baǵyttardy anyqtaýǵa múmkindik berdi. Bul qandaı da bir jazalaý sharalary úshin emes, medısına qyzmetkerlerin ataýly baǵytta oqytyp-úıretýge negiz bolady.
Sarapshylar keıbir medısına qyzmetkerleriniń MÁMS pen TMKKK paketteriniń arasyndaǵy aıyrmashylyqtardy anyq túsinbeıtinin, jarnalar men aýdarymdarǵa qatysty jaýaptardyń durys berilmeıtinin, tólem tásilderi, derbes tóleýshi men BJT tóleýshi arasyndaǵy tólem aıyrmashylyqtaryn túsinbeıtinin, saqtandyrýdyń mártebesi jáne ol bolmaǵan kezde medısınalyq kómek alý múmkindikteri týraly aqparattardyń jetkiliksiz ekenin aıtady.
Zertteý nátıjeleri boıynsha ár medısına uıymyna taldaý jasaldy. Joba arqyly kórsetiletin medısınalyq kómek sapasyn pasıent kózimen baǵalaýǵa tyrysqan atalǵan qordyń medısına qyzmetkerlerine arnalǵan barlyq oqytý is-sharalary anyqtalǵan jaǵdaılardy eskere otyryp túzetilmek.
