Buǵan deıin qurylǵan memlekettik jáne qoǵamdyq tetikter, sondaı-aq daıyndalǵan «qaýipsizdik belbeýi» jahandyq indet daǵdarystyń birinshi kezeńin jumsartýǵa múmkindik berdi, biraq búgingi tańda qıyndyqty eńserip qana qoımaı, odan ári damý vektoryna shyǵýǵa múmkindik beretin jańa sharalar qajet.
Sondyqtan Qazaqstannyń barlyq azamattary osy Joldaýdy álemdik naryqtardaǵy ekonomıkalyq kúızelisten, aýyr pandemııadan jáne áleýmettik-ekonomıkalyq máselelerden keıingi odan ári damýdyń mańyzdy suraqtaryna jaýap tabýǵa úmit artyp kútti.
Árıne Joldaý halyq pen eldiń eń mańyzdy, ózekti jáne ótkir máselelerine jaýap beretin erekshe mánge ıe boldy.
Birinshiden, Joldaýda eldegi jaǵdaıǵa barynsha aıqyn jáne egjeı-tegjeı taldaý jasalǵan jáne eldiń ekonomıkalyq jáne áleýmettik saladaǵy, memlekettik basqarý, qarjy salasyndaǵy damýyn tejeıtin barlyq naqty sebepter kórsetil-
gen.
Ekinshiden, «Jańa jaǵdaıdaǵy Qazaqstan: is-qımyl kezeńi» Joldaýy – reformalar týraly joldaý. Reformalar memlekettik basqarýdyń ınstıtýsıonaldyq salasyna aınalǵany mańyzdy, bul olardyń jan-jaqty eseptelýi men tıimdiligin kózdeıdi.
Bul ǵana emes, reformalar ınstıtýttaryn qurý – 2020 jylǵy Joldaý tek bastamasy ǵana ekenin jáne basty ózgerister áli alda bolatyny týraly aıqyn belgi. «Áleýmettik-ekonomıkalyq turaqtylyqty, jumys oryndaryn jáne halyqtyń tabysyn saqtap qalý» – birinshi kezektegi mindetter, biraq odan keıingi baǵdarlamalar da umyt qalmaıdy.
Úshinshiden, Prezıdent Q.K.Toqaev eldiń áleýmettik-ekonomıkalyq damýyn áleýmettik ádilettilik, tıimdilik jáne básekege qabilettilik basymdyqtaryna negizdelgen sapaly jańa vektor men damýdyń jańa qaǵıdattaryna shyǵarý jónindegi is-qımyldyń birtutas strategııasyn belgiledi.
Bul rette qoǵam ómiriniń barlyq salalary – ekonomıka, áleýmettik sala jáne eldiń saıası ómiri tereń reformalaýǵa ushyraǵanyn uǵyný qajet. Burynǵydaı jaıbaraqat tirlik endi eshqashan bolmaıdy.
Memleket basshysynyń naqty jáne aldyn alý tapsyrmalary ǵana emes, sondaı-aq reformalaýdyń tásilderi men joldaryn ózgertýge degen eń baıypty kózqarasy da nazar aýdarýǵa turarlyq. Zańnyń ústemdigi, adam quqyqtarynyń saqtalýy memlekettik basqarýdyń jańa modeli men azamattardyń múddesin qorǵaıtyn ádiletti memleket arqyly júzege asyrylady.
«Halyq únine qulaq asatyn memlekettiń» úlgisi memleketti basqarýǵa azamattyq atsalysýmen tolyqtyrylady, bul rette jergilikti ózin ózi basqarýdy damytýǵa, ıaǵnı azamattardyń ózderine tikeleı qatysty máselelerdi sheshýge qatysý múmkindigine basa mán beriledi.
Osy jerden Joldaýdyń taǵy bir tereń máni – onyń taǵy bir baǵyty – adam kapıtalǵa, eldiń ár azamatyna degen kózqarasy týyndaıdy.
Tórtinshiden, Joldaý Elbasy N.Á.Nazarbaev saıasatynyń tereń strategııalyq sabaqtastyǵyn kórsetedi. Buǵan «Rýhanı jańǵyrý» baǵdarlamasymen naqty úılesetin jáne «jaýapty memleket – jaýapty qoǵam – jaýapty adam» úshtuǵyrly júıesinde qoǵamdyq sanany jańǵyrtýdyń jańa koordınattaryn bildiretin «Ulttyń jańa sapasy» bólimi dálel bola alady.
Sondyqtan qoǵam men halyq aldaǵy reformalardyń qurylymdyq kúrdeliligi men tereńdigi Qazaqstannyń revolıýsııalyq emes, evolıýsııalyq damýyn talap etedi degen tezısti belsendi uǵynýy tıis.
Reformalar sınergııasy olardy júzege asyrý arqyly revolıýsııalyq nátıje beredi, demek, qoǵamdyq kelisim men jalpyulttyq birlik qaǵıdattary Joldaýdyń maqsattaryna qol jetkizýdiń – turaqty damyǵan, gúldengen Qazaqstandy qurýdyń basty sharty bolyp qala beredi.
Janseıit TÚIMEBAEV,
Qazaqstan halqy Assambleıasy Tóraǵasynyń orynbasary – Prezıdent Ákimshiligi QHA Hatshylyǵynyń meńgerýshisi
