Memleket basshysy «QazAgro» men «Báıterek» holdıngteri biriktiriletinin, sondaı-aq kvazımemlekettik kompanııalardyń sany qysqartylatynyn jetkizdi. Sonymen qatar sheneýnikterdiń sheteldik bankterde jatqan qarajatyna baılanysty jańa shekteýlerdi engizý usynylyp, syrttaǵy aqshany el ekonomıkasyna jumsaý joldary qarastyrylǵany qýantady. О́ıtkeni bul qarajat arqyly otandyq shaǵyn jáne orta bıznestiń áleýetin arttyrýǵa jol ashylar edi.
Memlekettik qyzmetshiniń nemese kvazımemlekettik mekeme basshysynyń qos azamattyǵy anyqtalǵan jaǵdaıda olar qyzmetinen bosatylatynyn naqtylady. Aýyl sharýashylyǵyna arnalǵan jer telimderin tıimdi paıdalaný boıynsha Ulttyq ekonomıka mınıstrligi men salaǵa jaýapty vedomstvo keshendi jumys atqarý qajet. Bul máselege Qasym-Jomart Toqaev ta udaıy kóńil aýdaryp keledi.
Prezıdent ekologııa máselesine de erekshe toqtalyp, «jasyl» ekonomıkany damytý boıynsha naqty qadamdardy aıtty. Bul bizdiń ekologııalyq qaýymdastyǵymyzdyń baǵyty. Aldaǵy ýaqytta jasyldar partııasy qurylsa, osy baǵytta jumys isteýge daıynbyz. Aıtalyq Qazaqstanda turmystyq, óndiristik jáne basqa da qaldyq túrlerin óńdeıtin kásiporyndardyń sanyn arttyrýymyz qajet. Sol sekildi elimizde jańǵyrmaly energııa kózderi, atap aıtqanda, jel men kúnnen óndiriletin energııanyń kólemin arttyrýǵa tolyq múmkindik bar. Bul óndirilgen qýatty ekonomıkany órkendetý úshin tıimdi paıdalana bilý kerek. «Jasyl» ekonomıkanyń tujyrymdasy osynda jatyr.
Joldaýda aıtylǵandaı, kvazımemlekettik uıymdardyń sanyn 10%-ǵa qysqartý ýaqtyly sheshim dep oılaımyn. Sebebi qajetsiz artyq jumys oryndaryn ashyp, memlekettik qarajatty jón-josyqsyz paıdalanyp jatyr. Osy rette kvazımemlekettik sektorǵa jumsalatyn aqshany ekonomıkanyń qajetti salalaryna aýdarǵan áldeqaıda tıimdi bolady degen senimdemin.
Azamathan ÁMIRTAI,
«Baıtaq-Bolashaq» ekologııalyq alıansynyń tóraǵasy
