Batyr Kıikbaıdyń esimi elimizdi bylaı qoıǵanda, Qytaı, Mońǵolııa jerin jaılaǵan qandastarymyz arasynda jaqsy málim. Batyr shamamen HÚII ǵasyrdyń sońynda Qaǵba óńirinde dúnıege kelip, 1740 jyldary Arqa jerinde ómirden ótken. El jadynda qalǵan estelikte Arqalyqtyń Alǵadaı, Aqózen atalatyn ólkelerinde ǵumyr keshse kerek. Zamanynda úsh júzge "Kıikbaı sheshen" degen atpen belgili bolǵan ol jasynan bılikke aralasyp, qazylyq qurypty, jesir daýy men jer daýyna ádil tórelik etipti. Tili de qylyshtaı ótkir bolsa kerek. Aıbyny asyp turǵan batyrdyń taýyp aıtqan sózine, tabandy kesimine jalpaq jurt bas ıgen. Ádildikten taban aýdarmaǵan, kóp kóńilindegi kúpti jaıdy jalǵyz aýyz sózimen taratatyn Kıikbaı bı aıtypty deıtuǵyn sheshendik sózder el jadynan óshken joq.
Batyrdyń artynda tórt uly qalypty. Urpaǵy qazir Atbasar, Semeı, Almaty óńirlerin jaılaıdy. Keseneniń ashylýyna jaman tumaýǵa baılanysty halyq kóp jınala almaǵanymen, sonaý Túrkııadan Ońbaı atty balalasynyń urpaǵy Zeınish ata rızashylyq hatyn joldapty. Qytaıdaǵy urpaqtarynan da júrekjardy alǵystary jetken. Ashylý rásimi barysynda aýdan ákimi A.Qaljanov bastaǵan ult janashyrlary sóz sóılep, bahadúr babalardan qalǵan belgilerge qamqorlyq jasaý keıinginiń paryzy ekendigi egjeı-tegjeıli aıtyldy. Batyrdyń Kóbegen esimdi úshinshi ulynan taraıtyn altynshy urpaǵy Hazy Bákeıulynyń aıtýyna qaraǵanda, urpaqtary 5 mıllıon 250 myń teńge kóleminde qarjy jınap, keseneniń qajetine jumsaǵan.
Oblystyq tarıhı-mádenı murany qorǵaý jáne paıdalaný ortalyǵynyń basshysy Serik Ysqaqovtyń aıtýyna qaraǵanda, el men jerin qadirleı biletin jalpaq jurt isterge uıytqy bolyp, osyndaı ımandy sharýalar aldaǵy ýaqytta da atqaryla beredi.
