Jarqyrap turǵan kósheler eń aldymen kerek dúnıeni ońaı tabýǵa, úlken-kishiniń adaspaı júrýine qolaıly bolsa, ekinshi jaqtan sýyq qoldy adamdardyń, buzaqy jandardyń erkin bosýyna jol bermeıdi. Jaryqta kórinip qalatyn bolatyndyqtan ondaılar erkin oıqastaı almaıdy. Sondyqtan jarqyraǵan jaryq tártiptiń saqtalýyna, adamdardyń qaýipsizdigin saqtaýǵa múmkindik beredi.
Sońǵy kezderi Petropavl kósheleriniń de túnde jaryq bolýy qolǵa alynyp, qala ákimi Bolat Jumabekov bul isti qatty qadaǵalap otyr. Qazir kóptegen kósheniń kúıip ketken shamdary aýystyrylyp, jańalary qoıylyp jatyr. Qala ákimdiginiń "Turǵyn-úı kommýnaldyq, jolaýshylar kóligi jáne avtomobıl joldary" bólimi "Eýropalyq Qaıta qurý jáne Damý" bankinen osy sharalarǵa nesıe alyp otyr. Alynǵan jáne jergilikti bıýdjetten bólingen qarajat qalanyń jarty turǵyndary (120 myń adam) turatyn bóligin tolyqtaı jaryqtandyrmaq. Bıyl eń úlken dep sanalatyn 16 kóshege jańadan shamdar iliný kózdelgen. Onyń 11-niń qarajaty jergilikti bıýdjetten bolsa, 5-eýi "Qaıta qurý jáne damý" bankinen alynǵan nesıeniń esebinen qarjylandyrylady.
Sonyń ishinde, qazirdiń ózinde Áýezov kóshesi tolyǵymen qaıtadan jaryqtandyryldy. Barlyq baǵandardaǵy kúıgen shamdar aýystyryldy. Áýezov kóshesi qalanyń úlkenderiniń biri edi, endi ol túnde de jarqyrap turatyn boldy. Al qazir Kenshinbaev, Astana, Bóketov, Ýálıhanov kóshelerinde bul jumystar jalǵasyn taýyp jatyr. Barlyǵy 6 myńdaı jańa sham iliný josparlanǵan.
Jaryqta turyp, jaryqta ómir súrgenge ne jetsin? Mundaı jańalyqtar Qyzyljar turǵyndaryn qýanta túsýde.
