Elorda turǵyndary tumaýǵa qarsy ekpe ala alady. Ol úshin pasıent ózi tirkelgen emhanaǵa júginýi kerek. Preparat kepildendirilgen tegin medısınalyq kómek paketine kiredi.
"Tumaýdyń aldyn alýdyń negizgi ádisi – antıdenelerdi qalyptastyratyn vaksına. Denedegi qorǵanys agentteri vırýstardy óltiredi jáne joıady. Bul ádis aldyn ala qoldanylýy kerek. Sondyqtan Nur-Sultanda 4 qyrkúıekten bastap reseılik vaksına paıda boldy. 0,5 shprıske quıylǵan daıyn ekpe ıyqtaǵy bulshyqetke salynady", dep atap ótti №10 qalalyq emhananyń joǵary sanatty dáriger-pedıatry Jankúmis Shaıhıslıamova.
Vaksınany alty aılyq balalarǵa da qoldanýǵa bolady. Preparat taýyq aqýyzyna allergııasy bar adamdarǵa ǵana ruqsat etilmegen.
"Sondaı-aq, qolyńyzdy sabynmen jıi jýyp, dezınfeksııalyq eritindilerdi qoldanýdy usynamyn. Qoldy jýý tek ishek ınfeksııalarynan ǵana emes, sonymen qatar vırýstyq ınfeksııalar men tumaýdan da qorǵaıdy. Muryn qýysyn álsiz tuzdy eritindimen jýý da kómektesedi. Muryndy jýý yńǵaısyz bolǵandyqtan, keıde maıly emýlsııalar qoldanylady. Mysaly, "oksolın maıy", onyń kúshi álsiz bolǵanymen de, aǵzaǵa vırýstyń taralmaýyna yqpal etedi. Vırýs aýyz ben murynnyń shyryshty qabattary arqyly enedi, sondyqtan olardy jıi shaıý kerek", dep túsindirdi dáriger.
Aǵzany nyǵaıtý úshin halyqtyq ádister de kómektesedi, deıdi dárigerler. Sonymen qatar, mýltıvıtamınderdi qabyldap, durys tamaqtaný da mańyzdy.
