Sońǵy bir aı kóleminde atalǵan baǵdarlama jastar arasynda qyzý talqylanyp jatyr. Osy ýaqyt ishinde azamattyq ustanym, bilim berý, jumysqa ornalastyrý, turǵyn úımen qamtamasyz etý jáne tulǵalyq damý syndy 5 negizgi baǵyt boıynsha 4 myńnan astam usynys kelip tústi.
Beınekonferensııa barysynda Jas Otan JQ jetekshisi Elnur Beısenbaev baǵdarlamada kórsetilgen tarmaqtardy iske asyrý úshin óńirlik jáne aýmaqtyq jol kartalary ázirlenetinin atap ótti.
«Jaqyn arada talqylaý jáne usynys qabyldaý maqsatynda barlyq jol kartalary Jas Otan-nyń saıtynda (jasotan.kz) jarııalanatyn bolady. Sol sebepten de jastar tarapynan biz áli kóptegen usynystar kútemiz», dedi uıym basshysy.
Jas kınorejısser, ssenarıst, New York Film Academy túlegi, «Qazaqstannyń 100 jańa esimi» jobasynyń jeńimpazy Aıdıe Aıdarbekov Almatyda jas kınorejısserler úshin qala kóleminde kóptegen baıqaý uıymdastyrylatynyn atap ótti.
«Biraq jumystyń sapaly bolýy úshin respýblıkalyq kınofestıvaldar ótkizýdi usynamyn. Sol festıvaldarda jas rejısserler óz jumystaryn usynyp qana qoımaı, tájirıbe jáne pikir almasa alady», dedi jas rejısser.
Baǵdarlama jobasynda jas ǵalymdarǵa da qatysty birqatar mindetter kórinis tapqan. Osy oraıda jas ǵalym, Qazaqstannyń Jas ǵalymdar alıansynyń negizin qalaýshy jáne tóraǵasy, PhD Ásııa Ermuhambetova:
– Meniń oıymsha, sońǵy ýaqytta ǵylymı ázirlemeler men zertteýlerge emes, startap-jobalarǵa da kóp kóńil bólinýde. Jas ǵalymdarǵa arnalǵan baıqaýlar kóptep uıymdastyrylýy kerek dep esepteımin. Sonymen qatar elimizde «Jas ǵalym» uǵymy áli kúnge deıin zańdy túrde bekitilmegen, sáıkesinshe ǵylym ókilderine qandaı da bir jeńildikter men qoldaý tetikteri qarastyrylmaǵan. Sonymen qatar árbir JOO qabyrǵasynda stýdentterdiń zertteý daǵdylaryn damytý mańyzdy, – dedi Ásııa Ermuhambetova.
Qorytyndy qujat «Jastar – Otanǵa!» baǵdarlamasy Jas Otan Jastar qanatynyń V sezinde qabyldanady. Qazirgi ýaqytta joba respýblıka boıynsha talqylanýda.
