Velosaıahatshy uzaq saparyn Qyzylorda qalasynan bastap, Tekeli qalasyna deıin 20 kúnde jetken. 13 jasynan velosıpedti serik etken arý 2014 jyldan beri osy sport túrimen aınalysyp, shet memleketterdiń 13 qalasynda bolyp úlgergen. Aqmaral bul jerge arnaıy Tekeli qalasynda ornalasqan «Burqanbulaq» sarqyramasy men taýly aımaqtardy kórý úshin kelgenin jasyrmady.
– Ásem tabıǵaty kórgen jannyń tańdaıyn tamsandyratyn aspanmen talasqan taýlary, jasyl jelekti baýlary janǵa da, malǵa da qutty meken. Jetisýdyń jaqutyndaı Qora, Shaja, Tekeli jáne Qaratal ózenderi birimen biri jalǵasa taýly ólkeniń sánin keltire, syldyraı aǵady. Meniń janyma jaqyn osy kórinis. Indet jaılaǵan shaqta, barynsha qaýipsizdigin eskerip velosıpedpen jolǵa shyqtym. Bala kúnimde osy mekendi kórsem dep armandaıtynmyn. Tekeliniń tumsa tabıǵaty janǵa shýaq, boıǵa qýat syılaıdy eken. Sharshaǵanymdy umytyp ta kettim. Sapar sátimen boldy dep oılaımyn, – deıdi A.Májıtova.
Onyń aıtýynsha, bul ıgi bastamaǵa muryndyq bolǵan velosport salasyn damytyp júrgen tekelilik «Velotravel Tekeli» týrıstik ortalyǵy. Ortalyq jyl saıyn dástúrli túrde osyndaı sharalar uıymdastyryp, qalanyń sándi nysandary men ǵajaıyp tabıǵatyn qonaqtarǵa tamashalatady. Bul balalar men jasóspirimderdi memlekettik patrıottyq jáne ekologııalyq ınternasıonaldyq tárbıelenýine jaǵdaı jasaıdy. Alystan kelgen qonaqty aldynan shyǵyp kútip alǵan Tekeli qalasynyń ákimi Baqtııar О́nerbaev mundaı ıgi bastamalar ishki týrızmniń damýynyń negizgi tetigi ekenin aıtady.
«Tekeli qalasynyń tabıǵı landshafty men klımattyq ereksheligi qala men onyń mańaıynda týrızmdi damytýǵa zor múmkindik beredi. Sondyqtan týrıstik sala Almaty oblysy basshylyǵynyń aıryqsha nazarynda. Qazirgi kezde oblys ákimi Amandyq Batalovtyń tapsyrmasyna sáıkes arnaıy týrıstik sharalar kóptep ázirlenip, týrıstik bazalar men basqa da týrıstik nysandardyń qurylysyna ınvestor tartý isi jolǵa qoıyldy. Bul baǵyttaǵy jumys keler jyly da jalǵastyrylady», deıdi B.О́nerbaev.
О́z kezeginde Tekeli qalasy ákimi birneshe shaqyrymdy artqa tastap, úlken táýekelmen saparlaǵan velosaıahatshy Aqmaralǵa alǵys aıtyp, marapat usyndy.
Aıta keteıik, Qyzylorda men Tekeli qalalarynyń arasy 1400 shaqyrymdy quraıdy. Uzaq jol Taldyqorǵan, Almaty, Taraz, Shymkent, Túrkistan qalalary arqyly ótedi.
