"Elordanyń jasyl beldeýi - qalanyń tynys alý organy ispettes. Orman ósirý Elbasynyń bastamasymen memlekettik komıssııanyń 1996 jylǵy qańtardaǵy qaýlysyn sheshilgen bolatyn. Osy ýaqyt aralyǵynda jasyl beldeý aıtarlyqtaı keńeıdi. Jyl saıyn myńdaǵan tal-terek otyrǵyzylady. Jasyl beldeý qalanyń ekologııasy men klımattyq jaǵdaıyn jaqsartýǵa septigin tıgizip keledi. Bıyl 330 myńǵa jýyq japyraqty, qylqan japyraqty kóshet jáne qosymsha taǵy 3 myńnan astam kóshet otyrǵyzamyz. Jalpy, aýmaqta 10,2 mln astam tal men 1,8 mln qaraqat, yrǵaı, deren, t.b. ósip keledi.
Kóktemde jasyl beldeýdiń soqpaq jol jelisin qaıta qurýǵa kiristik. Aýmaqta belsendi ýaqyt ótkizýge arnalǵan skeıtbordıng alańy, rolıkpen syrǵanaıtyn shaǵyn alańdardy (qysta konkı tebýge de bolady) salý jumystary júrgizilip jatyr. Jaıaý serýendeýge jáne kross-kantrı sabaqtaryna arnalǵan joldar salynady. Sondaı-aq, balalarǵa arnalǵan oıyn alańdaryn, fýtbol jáne tennıs alańdaryn jasaımyz.
Jasyl beldeýdi búginde qoıan, qarsaq, túlki, qyrǵaýyl jáne t.b. janýarlar men qustar mekendeıdi. Jasyl beldeýdegi qustardyń sanyn arttyrý boıynsha da jumysar júrgizilip jatyr.
Qazirgi jasyl beldeýdiń janynda ornalasqan ıppodromda ıppoterapııamen aınalysýǵa arnalǵan at-sporty kesheniniń qurylysyn aıaqtaımyz. Erekshe qajettilikteri bar balalardy ońaltýmen arnaıy oqytylǵan adamdar aınalysady. Ippodrom bazasy ulttyq jáne klassıkalyq sport túrlerin ótkizý jáne olarǵa daıyndyq, týrıstik marshrýt baǵyttary boıynsha damytylady. Ippodromnan Úrker (Ilınka) eldi-mekenine deıin velojol tóseldi. Qazir velosıped, shańǵylardy jalǵa alý úshin baza salamyz. Bul jumys jyl sońyna deıin aıaqtalady.
Elordanyń barlyq aýdandarynda kógaldandyrýǵa nazar aýdaryp kelemiz. Bıyl 30 myń túp aǵash otyrǵyzamyz. Aýlalardy, saıabaqtardy, tynymbaqtar men býlvarlardy abattandyrý kezinde kóshetter otyrǵyzamyz. Árıne olarǵa kútim jasaý mańyzdy. Otyrǵyzylǵan tal-terekter men gúlderdi kútip-baptaý úshin kóktemnen bastap sýarý júıesin 20%-ten 90%-ke deıin qalpyna keltirdik.
Prezıdent halyqqa Joldaýynda ekologııalyq týrızm mádenıetin belsendi damytý mańyzdy mindet ekenin atap ótti. Ol úshin elordada qala turǵyndary men qonaqtaryna arnalǵan ekoparkter qurý boıynsha jumystar júrgizilip keledi", - dep jazdy Altaı Kólginov.
