Rýhanııat • 09 Qyrkúıek, 2020

Jan jylýyna jeter ne bar?!

11 ret kórsetildi

Oblystyq isker áıelder qaýymdastyǵyna basshylyq etken bes jyl ishinde talaı-talaı taǵdyr ıelerimen tanysty. О́mirdiń ókpek jeli quzar shyńnyń basyna ıterip aparyp, jol tappaı ańtarylǵandardy da, taǵdyr qansha synaǵyna alsa da, taýy shaǵylyp kórmegenderdi de bildi.

О́mirdiń ózi kúres eken. Al kúres qashanda qajyr men qaıratty tileıdi. Ol bolmasa qadam basqan saıyn jige­riń qum, salyń sýǵa ketetini anyq. Kó­mek­teskisi kelgen. Jan jylýyn boı­ǵa darytatyn jyly sózimen de, materıal­dyq kómegimen de. Zárý dúnıe qashan taý­sylǵan? Dámeli Qoıshına kúlli álem­di jalǵyz qaýyzǵa syıǵyzǵan jaman tumaý qaharyn tógip kelgen kezde, el úıinen shyǵa almaı osharylyp, qareketsiz qalǵan ýaqytta bir sát tynym tapqan emes. Burynǵy burynǵy ma, jumysy toqtap, kásibi júrmeı ańta­rylǵan qanshama adam kómek suraǵan. Kásipkerlerge qaıta-qaıta qolqa salýǵa týra keldi. Quddy bir ózi úshin, óziniń otbasy úshin surap turǵandaı qysyla­tyn. Áıtse de, mynaý jaryq dúnıede izgi nıetti adamnyń adamgershiliktiń aq jolymen qaıyrymdylyq jasaý pa­ryz ekenin uqtyrǵan. Bir jaqsysy, aıtqan sózi, tilegen tilegi jerde qalǵan emes. О́zi de eldiń osyndaı meıirimdi, qysylǵan ýaqytta qolushyn sozatyn, qos qoltyǵynan perishtedeı jebep, de­mep áketetin janashyr jandardyń bar­lyǵyna, kóptigine ishteı razy. El bolǵan soń birin-biri elemese, birin-biri jebemese bola ma?

Karantın qos búıirden qysyp, pen­deniń peıilin taryltyp turǵan ýaqytta 125 otbasyna azyq-túlik sebetin taratyp, kó­mek kórsetti. Dastarqany júdeı bastaǵan júzge jýyq otbasyǵa 50 myń teńgeden qarjylaı járdem uıymdastyrdy. Ká­sipker áıelderdiń basyn qosyp, jal­ǵyzilikti, kópbalaly áıelderge meıi­rim shýaǵyn tókken. Bul synaqtan da qam­qorlyqqa muqtaj qanshama otbasy el birligi arqyly ótti.

«Perishte balalar» jobasyna da atsalysty. Osy oraıda, aýrý-syrqaý bala baǵyp otyrǵan analar ózderiniń mynaý álemde jalǵyz emes ekendikterin uqqan, qoldaýshy men qorǵaýshy bar eken, bir­ge ekenbiz, birimizdiń ıyǵymyzǵa tús­ken zilmaýyr salmaqty ekinshimiz ıyǵy­myzdy tosyp kóterýge beıil ekenbiz. Zárý jandar omyraýyn jasqa shylap júrse de, isker áıelder qaýymdastyǵynyń kómegi aldarynan bir úmitti sáýle jaǵyp turǵandaı sezingen. Bul oraıdaǵy eń qıyn is hırýrgııalyq ota jasalýy tıisti balalardy emdeýge atsalysý. Jergilikti jerde múmkin bolmaǵan ota alys-jaqyn shetelde táp-táýir júzege asyp jatyr. Bi­raq, qyrýar qarajatty tileıdi. Dámeli Qoıshına bastaǵan jomart júrek jandar Selınograd, Ereımentaý, Aqkól tárizdi birneshe aýdannyń jıyrmaǵa jýyq balasyna shet elderde ota jasaýǵa járdemdesti. Aıtpaqshy, bul oraıda naǵyz azamatqa tán peıil men meıir tanytyp júrgen atymtaı jomarttar az emes.

– Máselen, Selınograd aýdanyndaǵy Saıra Mataıbaeva, Ereımentaýdaǵy Tor­ǵyn Álıeva, Stepnıaktaǵy Gúlmaıra Baı­maqova, Býrabaı aýdanyndaǵy Gaý­har Hamzınalardyń esimderin aıryq­sha il­tıpatpen aıta ketýge bolady, – deı­di Dá­meli Qoıshına, – ásirese, Saıra Áı­ten­­qyzynyń eńbegi alabóten. Ol Qos­shy aýylynda jalpy quny 350 mln teń­ge turatyn 2630 sharshy metrlik, 200 oqý­shy­ǵa arnalǵan sý jańa mektep salyp berdi.

Qaýymdastyq qyrýar sharýa tyndyr­ǵan eken. Taıaýda «Qyzyl otaý» mektebin ashypty. Osy mektepte kásip isteımin degen, eshkimge alaqan jaımaı, óz betinshe tirshilik etemin degen áıelderdi oqytpaq. Qazir jıyrmadan astam áıel ártúrli kásipti ıgerýde. Dámeli Qýatqyzynyń pikirinshe, eń qaýiptisi – masyldyq. Tegin kómekti aıdalada jatqan batpanquı­ryq esebinde kóretinder de bar. Kó­mek suraǵan bir áıelge jylǵa jýyq járdemdesken. Azyq-túlikpen de, azyn-aýlaq qarjymen de. Sóıtse, ol áıel kúıeýimen birge turyp jatsa da, zań­dy túrde ajyrastyq dep qujat túz­gen. Tepse temir úzetin otaǵasy shybyq basyn syndyrmaı, qarap jatady da, áıel baıǵus kúnimdi kóre almaı jatyrmyn dep árkimge alaqan jaıady.

– Qoǵamdy masyldyqtan aryltý úshin eńbek etýge tárbıeleýimiz kerek. Son­da ǵana kisige kúnimiz túspeıdi, – deı­di Dámeli Qýatqyzy, – on eki múshesi saý adamnyń ózgeden kómek suraıtyny túsiniksiz.

Birneshe kópbalaly ananyń bas­pa­naly bolýyna járdemi tıipti. Máse­len, jeti balanyń anasy Marına Beh­told baspanaǵa zar bolyp qınal­ǵan­da, A.Myrzahmetov atyndaǵy Kók­she­taý ýnıversıtetiniń rektory Mádı Elý­baevqa bedelin salyp barýyna týra kel­gen. Mádı Saǵyntaıuly óziniń bir kezdegi ustazynyń tilegin eki etpeı, kóp­balaly anaǵa baspana satyp áperipti.

Qanshama jandy júrek jylýymen qanattandyryp kele jatqan isker áıelder qaýymdastyǵy aldaǵy ýaqytta da meıirim shapaǵatyn tóge bermek.

 

Aqmola oblysy

 

Sońǵy jańalyqtar

Saqtansań – saý bolarsyń

Aımaqtar • Keshe

Sırk - álem nazarynda

Qazaqstan • Keshe

Uqsas jańalyqtar