Ashylý saltanatyna Prezıdent Ákimshiligi Basshysynyń orynbasary Tımýr Súleımenov, Memlekettik qyzmet isteri agenttiginiń tóraıymy Anar Jaıylǵanova, Nazarbaev Ýnıversıtetiniń prezıdenti Shıgeo Katsý, Prezıdent janyndaǵy Memlekettik basqarý akademııasynyń rektory Erlan Ábil qatysty.
«Biz bárimiz VUCA áleminde ómir súremiz. Bul uǵym neǵurlym qubylmaly, boljamsyz jáne belgisiz, kúrdeli jáne túsiniksiz degendi bildiredi. COVID-19 álemi, sondaı-aq COVID-19-dan keıingi bolashaq kórinisi – VUCA áleminiń mysaly bola alady. Ssenarıılik josparlaýmen tanysý jáne bolashaqty oılaý, sondaı-aq halyqpen jáne Úkimettegi áriptesterimen strategııalyq kommýnıkasııa qura bilý, adamdardy biriktirý jáne túsiný úshin minez-qulyq túsinikteri men emosıonaldy ıntellektini ilgeriletý jáne damytý óte mańyzdy. Osynyń bári tabysty josparlaý men iske asyrý arasyndaǵy aıyrmashylyqty anyqtaıdy. Prezıdent Qasym-Jomart Toqaev óz Joldaýynda atap ótkendeı, nátıjeler mańyzdy. Osy kýrs arqyly siz elge qyzmet etý úshin jańadan ýájdeme men mindetteme alatynyńyzǵa tolyq senimdimin», dep atap ótti Nazarbaev Ýnıversıtetiniń prezıdenti Shıgeo Katsý.
Prezıdent janyndaǵy Memlekettik basqarý akademııasynyń rektory Erlan Ábildiń aıtýynsha, trenıng baǵdarlamasy «Jahandyq kózqaras», «Tıimdi kommýnıkasııalar» jáne «Transformasııalyq kóshbasshylyq» sııaqty úsh negizgi quzyrettilikter toptamasyna baǵyttalǵan. Bul – tıisti salada keshendi saıasatty ázirleý úshin, sondaı-aq memlekettik, úkimettik baǵdarlamalardy jáne basqa da jobalardy oryndaý barysyn retteý men baǵalaýdyń, memlekettik apparattyń ınnovasııalyq, nátıjege baǵyttalý, ıkemdilik jáne pragmatıkalyq qaǵıdattary boıynsha tıimdi uıymdastyrýshylyq mádenıetin qalyptastyrýdyń mańyzdy quramdas bóligi.
«Jańa formasııa basshysy» baǵdarlamasyn Tuńǵysh Prezıdent Nursultan Nazarbaev 2018 jyldyń 5 qazanynda «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda alǵash ret jarııalaǵan bolatyn. Elbasy Nazarbaev Ýnıversıtetine Memlekettik basqarý akademııasymen birge saıası basqarýshylar men memlekettik qyzmetshilerge arnalǵan trenıngter ótkizýdi tapsyrdy.
Vıse-mınıstrlermen, oblystar, qalalar men aýdandar ákimderiniń orynbasarlarymen, Prezıdent Ákimshiliginiń bólim basshylarymen birge Prezıdent Ákimshiliginiń jas kadrlar rezervinen de mamandar oqıtynyn atap ótken jón. 10 apta ishinde joǵary býyndaǵy saıası memlekettik qyzmetshiler memlekettik saıasatty ázirleýdiń negizgi salalarynda daǵdylaryn arttyrýǵa baǵyttalǵan trenıngterden ótedi, memlekettik basqarýdaǵy sońǵy úrdister men ınnovasııalarmen, ssenarıılik josparlaý men perspektıvalyq oılaýmen, memlekettik saıasat sheshimderin qabyldaýdaǵy strategııalyq kommýnıkasııalarmen jáne minez-qulyq ınsaıttarymen tanysady.
Aıta ketelik, Joǵary memlekettik saıasat mektebiniń qyzmeti – adamdardyń ómir súrý sapasyn jaqsartý maqsatynda mamandar men kóshbasshylardy túbegeıli memlekettik saıasat pen tıimdi basqarýdy túsiný men júzege asyrýǵa oqytý. 2012 jyly ashylǵan sátten bastap atalǵan mektep Sıngapýr ulttyq ýnıversıtetiniń Lı Kýan Iý atyndaǵy memlekettik saıasat mektebimen senimdi strategııalyq áriptestikti qoldap keledi. Joǵary memlekettik saıasat mektebiniń baǵdarlamalary memlekettik saıasat salasyndaǵy magıstratýrany, memlekettik basqarý salasyndaǵy magıstratýrany jáne memlekettik saıasat salasyndaǵy doktorantýrany qamtıdy. 2019 jyly Nazarbaev Ýnıversıtetiniń bul mektebi Memlekettik jáne mýnısıpaldy basqarý salasyndaǵy baǵdarlamalardy akkredıtteý boıynsha Eýropalyq qaýymdastyqtyń (EAPAA) resmı akkredıtteýinen ótti.a
