«Aqtaý – Bozjyra – Qarynjaryq – Býlyoıyq úńgiri» baǵyty boıynsha týrıstik saparǵa shyqqan toptan jasóspirim balasymen birge bólinip, basqa jolǵa túsip adasyp ketken Olgany izdeý ózgelerge eki kúndik jumys boldy.
– 4 kólik bolyp 29 tamyzda týrıstik saparǵa shyǵyp, arada bir táýlik ótkende Ústirt qoryǵyna jettik. Sol jerge túnep, erteńinde týrıster sońǵy núkte – Buloıyq úńgirine qaraı attanǵan edik. Ketip bara jatqanda Olga bizge basqa jolmen baratynyn eskertti. О́ıtkeni ol buǵan deıin de álgi úńgirge birneshe ret barǵan. Kólikte janarmaı jetkilikti edi. Biz úńgirde kezdesemiz dep kelistik. Biraq dittegen jerge jetkende Olgany tappadyq. Ol bárimiz jolǵa attanǵan núktege qaıtyp ketken bolar degen oımen kelgen izimizben keri qaıttyq. Biraq ony esh jerden tappadyq. Shekarashylar men qoryqshylar eshqandaı kólik kózderine túspegenin aıtty. Biz óz betimizshe izdeýge kirisip kettik. Jolaı «Legıon týr» birlestiginiń adamdaryn kezdestirdik, olar óz sharýasyn ysyryp qoıyp, bizge kómekke keldi. Jarty táýlik izdep, tappaǵan soń Jańaózenge baryp, áıel men bala joǵalǵanyn habarladyq. Sosyn joǵalǵandardy izdeýge qutqarýshylar jedel qosyldy, deıdi qurbysy Irına Mýraveva.
Izdeý jumystarynyń nátıjesinde Olga men balasy tabyldy. Olardyń kóligi beımálim sebeppen órtenip ketken eken.
– Ekeýiniń as-sýy az edi, onyń ústine qula túzde qoryqtyń jyrtqysh janýarlary bar, olarǵa shynymen úlken qaýip tónip turǵan bolatyn. Eger qutqarýshylar jedel qımyldamaǵanda áıel men balanyń jaǵdaıy ne bolar edi, kim bilsin. Biz Olga men balasyn qutqarýǵa atsalysqan barsha janǵa shynaıy rızashylyǵymyzdy bildiremiz, – deıdi Irına Mýraveva.
Týrıstik saparda saqtyq basym bolý shart, japan dalada joldy bilemin deý – sol dalanyń perzentterine ǵana jarasady.
Mańǵystaý oblysy
