Oblystyń ońtústik aýdandaryndaǵy birqatar shaǵyn sharýashylyqtar azyn-aýlaq astyǵyn shashaýsyz jınap ta alǵan. Al irgeli iri sharýashylyqtar dándi daqyldyń basym bóligin eńserip, endi maıly daqylǵa oraq saldy.
Arqalyq qalasyna qarasty 17 aýyldyń dıqandary bıyl jalpy aýmaǵy 270 myń gektar alqapqa bıdaı egipti. Dıqandar búginde oraq naýqanyn eńserip te qalǵan. Egin shyǵymy jaman emes, orta eseppen gektaryna 7-8 sentnerden keledi. Tabıǵaty qýań Torǵaı óńiri úshin bul jaqsy kórsetkish, deıdi arqalyqtyq dıqandar.
Al oblystyń soltústik aýdandarynda tamyz aıyndaǵy aptap ystyq bıdaıdyń sapasyn birshama tómendetip jibergen. Soǵan qaramastan, bıdaı shyǵymy byltyrǵydan joǵary. Taıaýda oblys ákimi Arhımed Muhambetov alqaptardy aralap, jıyn-terin barysyn ańdap kórdi.
– Eń bastysy – bar múmkindikti paıdalanyp, jer yrysyn shashaýsyz jınap alý kerek. Janar-jaǵarmaı jetkilikti, baǵa turaqty saqtalady. Tehnıka parki de saıly. Kún saıyn monıtorıng júrgizip otyrmyz. Alqaptardyń 60 paıyzdan astamy oryldy. Endi eki aptadaı kún ashyq tursa, bıdaıdy tolyq jınap alýǵa múmkindik bar, – dedi aımaq basshysy.
Oblystyń ońtústik óńirlerindegi birqatar shaǵyn sharýashylyqtar oraq naýqanyn aıaqtap ta qalǵan. «Bıyl jer yryzdyǵy mol, janarmaı qory da jetkilikti. Sońǵy bir-eki jyl boıy ónim ala almaı kelip edik. Osy jyly qordalanyp qalǵan biraz qaryzymyzdy jaýyp, tipti paıda túsirýden de úmittenip otyrmyz, – deıdi olar.
Qostanaı oblysy
