"112" biryńǵaı shuǵyl qutqarý qyzmeti arnasyna mobıldi telefonnan belgisiz er adam qońyraý shalyp, bomba qoıylǵandyǵy jóninde aıtqan.
Kınologtar men jarǵysh tehnıkter ǵımaratqa jáne sport kesheni aýdanyna qarap-tekserý júrgizgen, alaıda jarylǵysh qurylǵy tabylmaǵan. Jedel-izdestirý is-sharalarynyń barysynda terrorızm aktisi jóninde habarlaǵan alkogoldik masań kúıdegi 39 jasar er adam anyqtaldy.
Tergeý barysynda kúdikti adamnyń buǵan deıin urlyq pen alaıaqtyq jasaǵany jáne esirtki zatyn saqtaǵany úshin birneshe ret qylmystyq jaýaptylyqqa tartylǵany anyqtaldy. Er adam qamaýǵa alynyp, PD tergeý ızolıatorynda otyr. Atalǵan fakti boıynsha Qazaqstan Respýblıkasy QK-niń 273-babymen (Terrorızm aktisi týraly kórineý jalǵan habarlaý) tergeý júrgizilýde.
Elorda polıseıleri azamattar men elorda turǵyndaryna terrorızm aktisi týraly jalǵan habarlama úshin qylmystyq jaýaptylyq kózdelgenin eskertedi.
Jyldyń basynan bastap elordada terrorızm aktisi týraly jalǵan habarlama berýdiń 6 faktisi tirkelgen. Polıseıler atalǵan qylmys túrin 100% ashty.
Júrgizilgen taldaý nátıjesi terrorızm aktisi týraly kórineý jalǵan habarlama kóp jaǵdaıda kámeletke tolmaǵandardan, alkogoldik masań kúıdegi adamdardan kelip túsetinin kórsetip otyr.
Oılanbaı jasaǵan teris qylyqtardyń saldary materıaldyq shyǵyndy óteýmen qatar qylmystyq jaýaptylyqqa ákep soqtyratyny esińizde bolsyn.
