Parlament • 10 Qyrkúıek, 2020

Senatta erekshe qorǵalatyn tabıǵı aýmaqtar týraly qujat qaraldy

19 ret kórsetildi

Senat depýtattary birinshi oqylymda Parlament depýtattary bastamashylyq jasaǵan "QR keıbir zańnamalyq aktilerine erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly" zań jobasyn maquldady, dep habarlaıdy Egemen.kz Parlament Senatynyń baspasóz qyzmetine silteme jasap.

Senat Tóraǵasy Memleket basshysynyń Joldaýynda kórsetilgen basymdyqtardy júzege asyrý úshin alda aýqymdy jumystar turǵanyn atap ótti. Máýlen Áshimbaev Prezıdenttiń osy baǵytta naqty qandaı zańdar qabyldaý kerektigin kórsetip bergenine de nazar aýdardy. Soǵan sáıkes memlekettik qyzmet týraly zańnamaǵa tıisti túzetýler engiziletin boldy. Jyl sońyna deıin "О́nerkásip saıasaty týraly" zań ázirlenip, kvazımemlekettik sektordyń barlyq satyp alý jumystaryn retteıtin birtutas zań qabyldanady.

Senat Tóraǵasy Joldaýda Salyq kodeksin jetildirýge, sybaılas jemqorlyqpen kúresti kúsheıtýge jáne aqparatqa qol jetkizýdi qamtamasyz etýge basa mán berilgenin tilge tıek etti. Odan bólek, Memleket basshysynyń azamattardyń quqyǵyn qorǵaý, jergilikti ózin-ózi basqarýdy damytý, qoǵamdyq baqylaýdy kúsheıtý, qoǵamdyq keńesterdiń rólin arttyrý baǵyttarynda quqyqtyq negiz qalyptastyrýdyń mańyzdylyǵyna toqtalǵanyna nazar aýdardy.

"Aldymyzda aýqymdy jumystar tur. Sonyń bárin der kezinde jáne júıeli túrde júzege asyrý úshin aıanbaı eńbek eteıik. Árbir zań jobasyn ulttyq múdde, óńirlerdi damytý turǵysynan qarap, talqylaıyq. Bul – senatorlardyń mindeti. Zań jobalaryn qaraǵan kezde azamattyq qoǵam ókilderimen, memlekettik emes uıymdarmen, mamandarmen qoıan-qoltyq, tyǵyz jumys isteý qajet. Qoǵamnyń suranystaryn eskerip, ózekti problemalardy talqylap, olardyń sheshilýine úlesimizdi qosý – negizgi basymdyqtarymyzdyń biri", – dedi Máýlen Áshimbaev.

Sonymen qatar Senat Tóraǵasy otyrys barysynda qaralǵan erekshe qorǵalatyn tabıǵı aýmaqtarǵa qatysty zań jobasynyń mańyzy zor ekenin aıtty.

"Búgin birinshi oqylymda qaralǵan zań jobasy erekshe qorǵalatyn tabıǵı aýmaqtar salasyndaǵy zańnamany odan ári jetildirýge arnalǵan. Bul ózgerister – zaman talabyna saı. Sebebi, sońǵy aılarda el arasynda qorshaǵan ortany, jan-janýarlardy qorǵaýǵa qatysty máseleler qyzý talqylanǵany belgili. Depýtattar osy zań jobasynyń tujyrymdamasyn qoldap otyr. Endi bas komıtet jaýapty mınıstrlikpen birlesip, jumys barysynda týyndaǵan máselelerdi ekinshi oqylymǵa deıin jan-jaqty talqylaıdy", – dedi Máýlen Áshimbaev.

Zań "Kókjaılaý" taý shańǵysy kýrortyn salý úshin erekshe qorǵalatyn aýmaqtardyń quramynan shyǵarylǵan qoryq jerlerin jáne "Býrabaı" arnaıy ekonomıkalyq aımaǵy týrıstik kesheni úshin berilgen jekelegen ýchaskelerdi qaıtarý tetikterin engizýdi kózdeıdi. Qazirgi ýaqytta belgili bir maqsattarǵa bólingen tabıǵı qoryqtar men kýrorttyq aımaqtardyń ýchaskeleri maqsaty boıynsha paıdalanylyp otyrǵan joq. Parlament depýtattary bul aýmaqtardy ulttyq parkter men biregeı tabıǵı keshenderdiń quramyna, memlekettiń erekshe qorǵaýyna qaıtarý týraly bastama kóterdi.

Zań jobasyna sáıkes, Jer kodeksine jáne "Erekshe qorǵalatyn tabıǵı aýmaqtar týraly" Zańǵa ózgerister engizý qajet. Depýtattar ǵylymı jáne tehnıkalyq-ekonomıkalyq negizdemelermen emes, Úkimettiń usynysy boıynsha beıindi vedomstvomen jáne jergilikti atqarýshy organdarmen kelise otyryp, qoryq jerlerin erekshe qorǵalatyn tabıǵı aýmaqtardyń quramyna qaıtarý rásimin ońaılatýdy usynady. Zań jobasynda erekshe qorǵalatyn aýmaqtardyń quramyna jyl boıy maqsatqa saı ıgerilmegen bos jerler qaıtarylýǵa jatatyny aıtylǵan.

"Zańnyń máni erekshe qorǵalatyn aýmaqtardan ózge maqsatta paıdalanýǵa berilgen jerler jáne nysanaly maqsaty, týrızmdi nemese arnaıy ekonomıkalyq aımaqtardy damytý boıynsha paıdalanylmaǵan jerler qaıtarylýǵa jatady. Bir jyldan keıin, eger berilgen jer aýystyrylmasa jáne óziniń nysanaly maqsaty boıynsha paıdalanylmasa, Úkimettiń sheshimi boıynsha jáne ýákiletti organnyń kelisimi boıynsha erekshe qorǵalatyn tabıǵı aýmaqtardyń jerlerine qaıtarylady. Mysaly, AEA úshin "Býrabaı" kýrorttyq aımaǵynan 360 ga bólingen, onyń 110 gektary paıdalanylmaǵan. Mine osylar qaıtarýǵa jatady. Sondaı-aq, 1002 gektar paıdalanylmaǵan "Kókjaılaý" taý shańǵysy kýrorty keri qaıtarylady", – dep túsindirdi ázirleýshilerdiń biri Senat depýtaty Nurlan Qylyshbaev.

Sonymen qatar, Senattyń jalpy otyrysynda depýtattar Premer-Mınıstrdiń atyna saýaldar joldady. Senator Murat Baqtııarulynyń saýaly pandemııa kezindegi densaýlyq saqtaý júıesiniń jumysyna qatysty boldy. Álı Bektaevtyń suraýynda aýyldyq densaýlyq saqtaý máseleleri qozǵaldy. Andreı Lýkındi memlekettik-jeke menshik seriktestik pen ShOB aıasyndaǵy jobalardyń jaǵdaıy men damýy alańdatady. Aqylbek Kúrishbaev jeke qosalqy sharýashylyq kooperasııasyn damytý máseleleri boıynsha suraý saldy. Al senator Qaırat Qojamjarovty Ulttyq ulannyń jetkilikti dárejede qarjylandyrylmaýy máselesi alańdatyp otyr.

Sońǵy jańalyqtar

Qazaqstanda dollar qymbattady

Ekonomıka • Keshe

Uqsas jańalyqtar