Medısına • 11 Qyrkúıek, 2020

Narkozsyz neırohırýrgııa

18 ret kórsetildi

Ulttyq neırohırýrgııa ortalyǵynda oıaý jatqan naýqastyń mıyna narkoz salmaı operasııa jasaldy.

Almaty oblysynyń turǵyny Erkinbek Bashkeevti bıyl naýryz aıynan bastap bas aınalý men bas aýrýy mazalaı bastady. Bul mı isiginiń alǵashqy belgileri-tin. Biraq Erkinbek gemoglobıniniń ásheıinde de túsip ketetinine ba­­lap, oǵan onsha mán bermeı jú­re beredi. Alaıda birshama ýa­qyt ótken soń, ol esinen tanyp qalady. Osydan keıin úmit pen kúdik astasqan talaı zertteýler jasalyp, qorytyndy dıag­noz da qoıyldy. Ońaı emes, MRT zert­teýi mańdaıdyń sol jaq konvek­sıtaldy bóliminde isiný barlyǵyn, atap aıtqanda oń jaq jelke men sol jaq samaı bó­liginde 2 usaq uqsas isik oshaqtary bar mıishilik isik belgilerin kór­setti.

«Jyǵylǵan ústine judyryq» degendeı, ol osy kezde koronavı­rýstyq pnevmonııamen de aýyryp shyqty. Kórer jaryq pen tatar dámniń taýsylmaıtyn ısharatyn osydan da ańdaýǵa bolar, degenmen isiktiń aty isik. Kúpti kóńilden bir sát ketpeıtin ýaıym ornyǵyp qalǵandaı.

Ulttyq neırohırýrgııa orta­lyǵynda ótken konsılıýmda Erkinbektiń aýrý tarıhy medısına ǵylymdarynyń doktorlary men kandıdattarynyń qatysýymen ábden talqylandy. Konsılıým pasıenttiń shaǵym­daryn, aýrýdyń anamnezin já­ne pasıenttiń neırostatýsyn, sondaı-aq sol jaq parıetal­dy mańdaıda ornalasqan isiktiń mólsherin jáne onyń motor aı­maǵyna jaqyndyǵyna mán berdi. Eki aı burynǵy koronavırýstyq pnev­monııa eskerilip, S8-segment­tiń segmenttik atelektazymen asqynǵan, nekroz belgileri bar oń jaq ókpeniń C-r ilespe aýrý­lary nazarǵa alyndy. Al bul faktorlar ókpeni jasandy jel­detý apparatyn paıdalaný kezinde isikten qan ketýdiń úlken qaýpin kórsetetin. Ne amal bar? Konsılıým pasıentti operasııaǵa asa yjdahattylyqpen daıyndap, munyń ishinde medısınalyq kórsetilimdermen qatar psıholo­gııalyq daıarlyq ta bar, operasııany aýrýdy narkozben uıyqtatyp tastamaı, oıaý kúıinde jasaý kerek, bastyń isigi bar jerindegi jáne tamyrishilik anestezııamen tóbe aımaǵyndaǵy isikti alyp tastaý operasııasyn jasaý qajet degen uıǵarym shyǵardy.

Ortalyq júıke júıesiniń patolo­gııasy bólimshesiniń meńge­rý­shisi, professor Nurjan Rys­keldıevtiń aıtýynsha, naýqastyń esin saqtaı otyryp jasalatyn mundaı operasııalarǵa dárigerler jıi bara bermeıdi, biraq jyl saıyn tek qana medısınalyq kórsetkishter boıynsha jáne muqııat daıyndyqtan keıin, basqa joldar tıimsiz sanalǵanda osyndaı qadamdar jasalady eken. Ár túrli mamandyqtaǵy klınıkanyń kóptegen dárigerleri qosylyp, qajettik týǵanda mundaı operasııa jasaý praktıkada bar. Biraq kúnde atqarylatyn sharýa emes. О́ıtkeni bul – qarapaıym emes, neırohırýrgten zergerlik dál­dikke qosa, operasııa bary­synda anestezıologtardyń, neı­rofızıologtardyń joǵary kási­bıligin qajetsinetin úılesim­dilik pen úndestikti talap etetin óte jaýapty dúnıe.

Operasııa júrip jatyr. Er­kin­bektiń sanasy, bar oıy dári­gerler qımylynda. Olar da pa­sıentpen sóılesip, suraqtar qoıyp, motor fýnksııasynyń saqtalýyn qadaǵalaýda. Aýrýmen arpalysqan sheshýshi kezeńder. Mıdaǵy isikti alyp tastaý júrip jatyr. Erkinbek bolsa sóılep, dáriger suraǵyna jaýap berýde. Bul – Erkinbektiń boıǵa jabysqan dertti sylyp alyp tastap jatqan dárigerlerge ózinshe kómektesýi. Operasııaǵa daıyndyq barysynda dárigerler «sizdiń ishki ustanymyńyz, aýrýdy jeńýge degen erik kúshińiz bizge kómekke keledi» degendi este ustaǵany. Suraqtarǵa jaýap bergen soń, operasııanyń qozǵalys fýnksııalaryna áseri qanshalyqty ekenin anyqtaǵysy kelgen neırohırýrg qol- aıaǵyn qozǵaltýdy surady. Aıtqandaryn istedi, mı barlyǵyn basqaryp tur. О́zi de qýanyp qaldy. Qansha de­genmen bastyń ishine, mıdy uńǵyp operasııa jasaý degen ońaı ma? Qorqynyshy seıildi. Dá­rigerlerdiń janyn alyp qa­la­tynyna, Jaratqannan ketýge buıryqtyń kelmegenin, úıine baryp, bala-shaǵasymen qaýyshatynyn oılady.

 Sol jaq tóbe aımaǵyndaǵy kranıotomııa operasııasy – isik­tiń mıkrohırýrgııalyq jolmen tolyq joıylýy shamamen eki saǵatqa sozyldy. Bir-birin aıqyn uǵynǵan kásibı sheberlikteri joǵary mamandar shoǵyry operasııany sátti ótkizdi. Naýqas qazir ózin jaqsy sezinedi jáne klınıkadan úıine shyǵýǵa daıyn­dalý ústinde.

«Men úshin bári sátti bolǵa­nyna óte qýanyshtymyn, osyn­daı kúrdeli operasııaǵa qara­mastan, dárigerler isikti toly­ǵymen alyp tastady. Men óz salasynyń myq­ty maıtalman mamandary jumys isteıtin osy klınıkaǵa kel­genime qýanamyn. Meniń týys­tarym «Operasııa kezinde qor­qyp kettiń be?» dep suraıdy. Biraq is júzinde mende qobaljý, qorqynysh bolǵan joq, kerisinshe joǵary kásip ıeleriniń qolynda ekenime jáne maǵan osynda kómek kór­setiletindigine senimdi boldym. Úıde meni súıikti otbasym, áıe­lim jáne tórt balam kútýde. Neı­rohırýrgııa ortalyǵynyń dárigerleri men qyzmetkerlerine sheksiz alǵysymdy bildiremin!» deıdi Erkinbek Bashkeev.

Operasııany Ulttyq orta­lyq­tyń úzdik mamandary jasa­dy. Atap aıtqanda Ortalyq júı­ke júıesiniń patologııasy bólimshesiniń meńgerýshisi, «UǴO» AQ professory Nurjan Rys­keldıev, «UǴO» AQ professory Aıdos Dosqalıev, neırohırýrg dáriger Nurzat Syǵaı, biliktiligi joǵary sanatty anes­tezıolog-reanımatolog dáriger Raýshan Toqshekenova, biliktiligi joǵary sanatty anestezıolog-reanımatolog dáriger Natalıa Zýdılına asqan sheberlikterin tanytty.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar