Senbi, 10 sáýir kúni tańerteń Reseı Federasııasynyń Smolensk oblysyndaǵy Pechersk qalasynyń túbinde qalyń tuman jaǵdaıynda qonýǵa bet alǵan Polsha Prezıdenti Leh Kachınskııdiń Tý-154 ushaǵy apatqa ushyrap, bortyndaǵy 96 adam túgel qaza tapty.
Leh Kachınskıı bastaǵan Polsha memleketi saıası elıtasynyń bir toby osy ushaqpen Smolensk oblysyndaǵy Katyn mekeninde osydan 70 jyl buryn, 1939 jyly Stalınniń ozbyr saıasaty saldarynan jazyqsyz atylǵan polıak ofıserleriniń rýhyna taǵzym etý sharalaryna qatysý úshin kele jatqan edi. Delegasııa quramynda Polsha ortalyq bankiniń basshysy S.Skpıshek, Syrtqy ister mınıstriniń orynbasary A.Kremer, Áskerı kúshterdiń bas qolbasshysy F.Gagor, Polsha seıminiń 50 depýtaty jáne prezıdenttiń jubaıy Marııa Kachınskaıa bolǵan. Sonymen qatar, bortta jazyqsyz atylǵan polıak ofıserleriniń týystary men urpaqtary da bar edi. Qazir apattyń bolý sebepterin anyqtaıtyn reseılik komıssııa quryldy. Sondaı-aq Polsha da ózi tarapynan arnaýly komıssııa qurýdy qolǵa aldy. Reseılik mamandardyń ázirgi málimetterine qaraǵanda, apat ushqyshtyń qateliginen bolǵanǵa uqsaıdy. Biraq polıak jaǵy ony joqqa shyǵaryp, qatelik áýe dıspetcherleri tarapynan oryn alǵan sekildi dep otyr... Prezıdent L.Kachınskııdiń máıiti jeksenbi kúni Polshaǵa jetkizildi.
