Is-sharanyń maqsaty – Abaı Qunanbaıulynyń muralaryn keńinen nasıhattaý jáne jazý mádenıetin qalyptastyrýǵa yqpal etý.
"Qazaqtyń uly aqyny Abaıdyń 175 jyldyǵy atalyp ótip jatyr. Osyǵan baılanysty elimizde ártúrli sharalar uıymdastyrylýda. Solardyń biri – búgingi jalpyhalyqtyq dıktant. Dıktantqa bir adamdaı qatysyp otyrǵandaryńyz úshin alǵys aıtamyn. Bul dıktanttyń qandaı maqsaty bar? Otan ortaq bolǵannan keıin, til men jer ortaq. Iаǵnı elimizdegi qandaı da bolsyn uly tulǵalar da ortaq", dedi Til saıasaty komıtetiniń tóraǵasy Ádilbek Qaba.
Osy oraıda ol memlekettik til men uly tulǵalar ultty biriktiretinin, bárimizdi tutas el etetinin atap ótti.
"Sondyqtan búgin barshyńyzdyń qatysýlaryńyzben memlekettik tilde uly Abaıdyń 175 jyldyǵyna arnalǵan "Uly Abaı – halyq júreginde" taqyrybynda respýblıkalyq dıktant jazýdy qolǵa alyp otyrmyz. Abaıdyń shyǵarmashylyǵy bárimizge jaqsy tanys. Ol uly adamnyń eńbekteri eshqashan da ultqa bólinbeıdi. Uly shyǵarmashylyq barlyq adamzatqa tán, ıaǵnı Abaı tek qazaqtyń ǵana emes, adamzatqa ortaq uly tulǵa", dep tilge tıek etti komıtet tóraǵasy.
Bul sharaǵa Til basqarmalary qyzmetkerleri, oblystyq jáne aýdandyq tilderdi oqytý ortalyqtarynyń oqytýshylary, ádiskerler, til mamandary jáne memlekettik qyzmetshiler qatysty. Dıktant respýblıkamyzdyń ár óńirinde belgilengen kúnderge sáıkes ótkizildi. Dıktant 145 sózden turady. Al mátini Abaıdyń qara sózderinen qurastyrylǵan.
