Qashyqtan oqytýǵa kóshkennen keıin únemdelgen qarajat kompıýterlik tehnıka satyp alýǵa jáne mektepterde beınebaqylaý júıesin ornatýǵa baǵyttaldy. Bul týraly brıfıng barysynda Nur-Sultan qalalyq bilim basqarmasynyń basshysy Sholpan Qadyrova málimdedi.
"2020 jylǵa arnalǵan bıýdjette 1-4 synyp oqýshylarynyń tamaqtanýyn uıymdastyrýǵa 5,2 mlrd teńge qarjy qarastyrylǵan. О́tken oqý jylynyń tórtinshi toqsanynda qalyptasqan tamaqtanýdan únemdelgen 1,6 mlrd teńge qarjy qashyqtan oqytýdy uıymdastyrýǵa qaıta bólindi. Onyń ishinde kompıýterlik jabdyqtar satyp alýǵa, barlyq bilim berý uıymdary úshin ınternet-baılanys pen beınebaqylaý ornatýǵa bólindi. Mysaly, 5200 marshrýtızator, 2613 dana kompıýterlik tehnıka satyp alynyp, bilim berý uıymdarynda beınebaqylaý ornatyldy", dep túsindirdi Sh.Qadyrova.
Spıkerdiń aıtýynsha, búginde 9700 oqýshy men muǵalim mektep qorynan kompıýterlik tehnıkamen qamtamasyz etilgen. Sondaı-aq 22600 oqýshyǵa roýter taratyldy.
"Qazirgi ýaqytta 34 372 kompıýter satyp alyndy. Úkimettiń rezervinen 26472 dana kompıýterlik tehnıkany satyp alýǵa bıýdjet qarajaty bólindi. Sonymen qatar jergilikti bıýdjetten 8 myń noýtbýk satyp alynady", dep túsindirdi Sh.Qadyrova.
Bul rette bilim basqarmasy birinshi kezekte jetim balalarǵa, erekshe qajettilikteri bar balalarǵa, az qamtylǵan jáne kóp balaly otbasylarǵa kompıýterlik jabdyqtar beriletindigin atap ótti.
Esterińizge sala keteıik, Qazaqstanda 5-11 synyptar úshin oqý jyly qashyqtan bastaldy. Ata-analardyń qalaýy boıynsha sanıtarııa erejelerin saqtaı otyryp, 1-4 synyptar úshin kezekshi toptar uıymdastyrylady.
