Petropavldyń soltústik jaq shetinde "Meshan ormany" dep atalatyn qalyń qoınaý bolatyn. "Meshanstvo" degenniń ózi ejelgi Reseıdegi qala turǵyndarynyń bir soslovıesi ǵoı, olarǵa negizinen qolónershiler, kópester sııaqty eńbekqor turǵyndar jatady. Ormannyń olardyń atyn alǵanyna qaraǵanda sondaı adamdar da munda kóp keletin bolsa kerek.
Kezinde qazaq jurtshylyǵy arasynan da munda azamattar atpen kelip, saýyq etedi eken. Maǵjan Jumabaevtyń nemere inisi Ǵadylsha Qaharmanuly osy ormanǵa dem alýǵa appaq bolyp kıingen aǵa-jeńgesin faetonmen ákeletinin jazyp ketken. Sonda appaq qaıyńdy qalyń ormannyń baýyrynda adamdar qyzyqtap, ári taza aýa jutyp, ári ákelgen as-sýlaryn iship, sol jerde qazaqtyń dombyramen aıtqan ánderin, tatardyń syrnaıyn tyńdap, rahat bir kúı keshedi eken. Qazaqtar men tatarlar, ásirese, Maǵjannyń mańyna úıirilip, áńgime-dúken quryp, aqynnyń áńgimelerin, jańa óleńderin tyńdaýǵa qushtar bolǵan.
Keńes odaǵy jyldarynda ormannyń ondaı demalys orny mártebesi bolmasa da, aǵashtaryn kesýge qatań túrde tıym salynyp, syńsyǵan qaıyńdar qalanyń shetin jelpintip turatyn edi. Táýelsizdik jyldarynda sol orman eptep otala bastady. Qoly uzyndar sol jerden oryn alyp, aq qaıyńdardy otap, ornyna kottedj úıler turǵyza bastaǵan. Otarlaýdy bastap, jerdi satýdy alǵash bastaǵan ákimdi de qala turǵyndary biledi. Alaıda ormannyń negizgi sulbasy qalǵan edi.
Endi sol jerdi baǵbanshylardyń Palıanova Marına Aleksandrovna degen hanym basqaratyn "Vesnıanka" saıajaı kooperatıvi alyp, "Meshan ormanyndaǵy" sulý qaıyńdardy uzynnan sulatyp, kesip jatqan kórinedi. Muny bir-birinen estigen qala jurtshylyǵy, tabıǵat janashyrlary úlken shý týdyryp, áleýmettik jelilerdiń betin basyp ketti. Sýretter men beınejazbalardan aq jelekti qaıyńdardyń sulap jatqanyn kórgende jany ashymaǵan jan joq shyǵar. Halyq ormandy saıajaı kooperatıvine bergen jergilikti bılikti de jazǵyryp jatyr. Biraq bılik aq qaıyńdardyń saqtalýyn, kesilmeýin kelisimshartqa jazǵan bolýy kerek, óıtkeni qala ákimdiginiń turǵyn úı-kommýnaldyq sharýashylyǵynyń ókilderi qalalyq polısııa basqarmasyna aǵashtardyń zańsyz kesilip jatqanyna shaǵymdanǵan. Birinshi polısııa bóliminiń tártip saqshylary tekserý júrgizgende Petropavl qalasynyń 1961 jyly týǵan turǵynyna tıesili saıajaı ýchaskesiniń aýmaǵynda tıisti ruqsat qujattary resimdelmegen aǵash kesý faktileriniń oryn alǵany anyqtalǵan. Ony qojaıynnyń tapsyrmasymen jaldamaly jumysshylardyń júzege asyrǵany anyqtaldy.
Atalǵan quqyq buzýshylyqtarǵa jol bergeni úshin ýchaskeniń ıesine qatysty Ákimshilik quqyq buzýshylyq týraly Kodekstiń "Aǵashtar men butalardy zańsyz kesý, joıý nemese zaqymdaý" baby boıynsha materıal jınalyp, sheshim qabyldaý úshin Petropavl qalasynyń sotyna joldandy.
