Qoǵam • 12 Qyrkúıek, 2020

Qazaqstan jastarynyń negizgi problemalary talqylandy

43 ret kórsetildi

Nur-Sultanda "JASTAR: ózekti másele" pikirtalas alańynyń alǵashqy májilisi ótip, sarapshylar Memleket basshysynyń "Jańa jaǵdaıdaǵy Qazaqstan: Is-qımyl kezeńi" Joldaýy men Qazaqstan jastary damýynyń ózekti máselelerin talqylady, dep habarlaıdy Egemen.kz

Qazaqstan halqyna arnaǵan Joldaýynda Prezıdent búgingi kúnniń basty maqsaty – sapaly ult qalyptastyryp, halyqtyń damýynyń jańa paradıgmasyn qurý ekendigin atap ótti. Sondaı-aq el aldynda turǵan kúrdeli de, úlken máselelerdi sátti sheshý úshin jańa kózqaras, ortaq júıe jáne jan-jaqty qoldaý qajet. Osy oraıda "Rýhanı jańǵyrý" qazaqstandyq qoǵamdyq damý ınstıtýtynyń janyndaǵy "Jastar" ǵylymı-zertteý ortalyǵy "JASTAR: ózekti másele" alańyn bastady.

Ashyq pikirtalas uıymdastyryp, jańa kózqarastardyń atyrabyn bir torapqa toǵystyrý úshin alǵashqy májiliske jas ta bolsa, tájirıbesi mol, úlken jobalarda iri jetistikterge qol jetkizip, óz salalarynda aıtýly problemalardyń túıinin sheship júrgen jastar toby shaqyryldy. Qazaqstan Respýblıkasy Aqparat jáne qoǵamdyq damý vıse-mınıstri Asqat Oralovtyń aıtýynsha, "JASTAR: ózekti másele" alańy qoǵamdaǵy ózekti máselelerdi ár saladaǵy bilikti mamandarmen birge atqaryp sheshý úshin taptyrmas oryn.

"Jahandyq pandemııa qoǵamnyń áleýmettik-ekonomıkalyq jaǵdaıyna úlken ózgerister jasap, kúndelikti turmys-tirshilikke túbegeıli túzetý engizdi. Osy oraıda Memleket basshysynyń «Jańa jaǵdaıdaǵy Qazaqstan: is-qımyl kezeńi» Joldaýy barlyq túıtkildi máselelerdiń sheshimin tabýǵa serpin berýi tıis. Prezıdent adam kapıtalynyń damýyna da úlken mán berdi. Osy oraıda, erteńgi qoǵamnyń negizgi irgetasy búgingi óskeleń urpaq, ıaǵnı jastar ekenin eskerýimiz kerek", dedi Ashat Oralov.

О́z kezeginde májiliske qatysýshylar Prezıdent Joldaýynyń negizgi baǵyttaryn talqylap, Qazaqstan jastarynyń máselesine de toqtaldy. Osy oraıda, sarapshylar tarapynan halyqtyń sanasyn jańǵyrtýǵa baǵyttalǵan bastamalar da usynyldy. Sonymen qatar, pandemııa kezinde jas mamandardy jumyspen qamtý máselesi de kóterilip, áleýmettik kásipkerlikke kóńil bólýge shaqyrdy. "Green TAL" áleýmettik sheberlik qoǵamynyń negizin qalaýshy Emın Áskerovtiń pikirinshe, búginginiń basty maqsattarynyń biri – patrıot jastardy tárbıelep, sanaly qoǵam qalyptastyrý.

"Pandemııadan týǵan daǵdarystyń saldarynan qazir jumys oryndary qatty qysqaryp jatyr. Nátıjesinde, aýyldarda margınal jastar kóbeıip ketti. Sondaı-aq shetelge birjola ketip qalýdy ańsaıtyn jastardyń da kóptigi alańdatady. Osyndaı jaǵdaılarǵa tosqaýyl bolý úshin eldegi ekonomıkalyq jaǵdaıdy jaqsartyp, jastardyń sanasyn jańǵyrtatyn jobalar qajet. Osy oraıda áleýmettik kásipkerlerdi qoldaýymyz kerek. Olardyń sany Qazaqstanda 250 ǵana. Salystyrmaly túrde aıtaıyq, Ulybrıtanııada 70 myń áleýmettik kásipkerlik top tirkelse, AQSh-ta olardyń sany 160 myńnan asady eken. Jalpy mynany túsinýimiz kerek: áleýmettik bıznes tutynýshylardyń naqty bir problemalaryn sheshý maqsatynda paıda bolyp, qoǵamnyń áleýmettik osal toptarynyń máselelerin sheshedi. Sondyqtan, mundaı jobalardy qoldaý arqyly biz halyqtyń áleýmettik ahýalyn jaqsartamyz", dedi Emın Áskerov.

Májilistiń qorytyndysy boıynsha sarapshylardyń barlyq usynystaryn salalyq mamandardyń óńdeýine berilip, ári qaraı júzege asyrylýy úshin tıisti jumystar júrgiziletin bolady. "Rýhanı jańǵyrý" QQDI Basqarmasynyń tóraǵasy Danııar Esınniń aıtýynsha, álemniń damyǵan 30 eliniń qataryna kirý úshin qoǵam bolyp birigip, kózi ashyq, básekege qabiletti jastardy birlese tárbıeleýimiz qajet.

"Bıyl "Rýhanı jańǵyrý" baǵdarlamasyna 3 jyl jáne onyń basty ustanymdary kóp jaǵdaıda jastarǵa arnalǵan. Sondyqtan jastar saıasaty turǵysyndaǵy máselelerdi sheshý jáne qoǵam arasyndaǵy baılanysty ornatý qundy dúnıe. Osyndaı pikirtalas alańdaryn uıymdastyryp, jastardyń zamanaýı kózqarasy arqyly qoǵamnyń túıtkildi máselelerin ońtaıly sheshýge ábden bolady", dedi Danııar Esın.

Dóńgelek ústelge QR Aqparat jáne qoǵamdyq damý vıse-mınıstri Ashat Oralov, "Rýhanı jańǵyrý" QQDI" Basqarmasynyń tóraǵasy Danııar Esın, QR Aqparat jáne qoǵamdyq damý mınıstrligi Jastar jáne otbasy komıtetiniń tóraǵasy Shahmardan Baımanov, "Jastar" ǴZI dırektory Aıan Sakoshev, QR Parlamentiniń Senaty apparat jetekshisiniń orynbasary Maksım Spotkaı, "Atameken" QR Ulttyq kásipkerler palatasy Basqarma tóraǵasynyń orynbasary Oljas Ordabaev, QR Joǵarǵy Sot apparaty jetekshisiniń orynbasary Nursultan Baıtilesov, QR Kásipodaqtary Federasııasynyń tóraǵasynyń orynbasary Qaırat Janabekov, "Green TAL" áleýmettik sheberlik qoǵamynyń negizin qalaýshy Emın Áskerov, sondaı-aq, ǵylymı jáne shyǵarmashylyq qoǵamdastyqtyń ókilderi, qoǵam qaıratkerleri men sarapshylar qatysty.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar