Zerendi aýdanynyń dıqandary bıyl 277 myń gektar alqapqa dándi daqyldar tuqymyn sińirgen bolatyn. Bıylǵydaı qýańshylyq jyly topyraǵy qunarly óńirde táp-táýir egin ósti. Uzaq jylǵy baı tájirıbesi bar dıqandar agrotehnıkalyq sharalardy ýaqytyly ári minsiz atqarýǵa bar kúsh-jigerlerin jumyldyrǵan bolatyn. Ásirese, kóktemgi ylǵal jabý jumystaryna úlken úmit artty. Sonyń nátıjesinde kúzgi bereke kóńil toǵaıtarlyq. Gektar berekesi 13,8 sentnerden aınalýda. Bul oblystaǵy táýir kórsetkishterdiń biri. Qazir aýdandaǵy egistik alqaptarynyń 74 prosenti oryldy. Aldaǵy kúnder ashyq bolsa, az ýaqyttyń ishinde bar ónimdi jınap almaq.
Oblysta egin oraǵyn alǵashqylardyń biri bolyp aıaqtaǵan "Dıqan Plıýs" seriktestigi 23 myń gektar alqapqa dán sińirgen bolatyn. Búgingi kúni eńbekqor ujym kúzgi dala jumystaryn tolyq aıaqtap, jerden óngendi jerde qaldyrmaı, bar astyqty qut qambalaryna quıyp aldy.
"Qyrmanǵa 26800 tonna bıdaı jetkizildi. Jaýapty naýqan qyzyp turǵan ýaqytta eki brıgada kúni-túni tynbaı eńbek etti", – deıdi qyrman meńgerýshisi Maksım Glýshkovskıı, – qazir astyqty tazalaýdamyz. Bul arada keler jyldyń tuqymyna da aıryqsha kóńil aýdarylyp otyrǵandyǵyn aıta ketsek artyq bolmas. Qazirdiń ózinde bes myń tonna tuqym daıyndalypty.
О́nimdi saqtaýda jańa tehnologııalar paıdalanýda. Sonyń biri astyq saqtaý qapshyǵy. Syıymdylyǵy 200 tonna bolatyn qapshyqqa keptirilip salynǵan dándi bir jylǵa deıin saqtaýǵa bolady eken.
Bir aıta keterligi, sharýashylyqta jumysshylarǵa jaqsy jaǵdaı jasalǵandyǵy. Bar kúsh-jigerin el yryzdyǵyn shashpaı-tókpeı jınap alýǵa jumyldyrǵan dala erleriniń ashanasyndaǵy dám til úıiredi. Syrttan kelip isteıtinderge arnalǵan jataqhana da jaıly. Sharýashylyq aýyldyq okrýgtegi 168 adamdy jumyspen qamtyp otyr. Turaqty jalaqymen birge áleýmettik-turmystyq jaǵdaılary da nazardan tys qalǵan emes.
"Seriktestiktiń septigi tıip tur", – deıdi Kúsep aýyldyq okrýginiń ákimi Berkindi Bekbolatov, – qystyń kúni jolymyzdy tazalap beredi. Karantın kezinde de qol ushyn sozdy. 12 otbasyna 50 myń teńgeden qarjylaı kómek kórsetti. Áleýmettik jaǵynan az qamtylǵandarǵa azyq-túlik sebetin de taratyp jatyr.
О́z sharýasyn tap-tuınaqtaı etip tyndyrǵan seriktestik endi kórshilerine kómektesýde. Olardyń astyq kombaındary qazir ózge sharýashylyqtardyń eginin jınap jatyr.
Aqmola oblysy,
Zerendi aýdany.
