Onlaın rejimdegi beınekonferensııa Qazaqstannyń Saýda jáne ıntegrasııa vıse-mınıstri Qaırat Tórebaev pen Úndistannyń Saýda jáne ónerkásip mınıstriniń orynbasary Bıdıýt Beharı Sveınniń teńtóraǵalyǵymen ótti. Sharaǵa eki eldiń Tótenshe jáne ókiletti elshileri, sondaı-aq múddeli memlekettik organdary men uıymdarynyń ókilderi qatysty.
Qaırat Tórebaev atap ótkendeı, Qazaqstan Úndistanmen ózara tıimdi saýda-ekonomıkalyq yntymaqtastyqty odan ári damytýǵa úlken mán beredi. Jumys tobynyń osy jolǵy onlaın jıyny Qazaqstan basshysy Q.Toqaevtyń Úndistanǵa saparyna daıyndyq kezeńderiniń biri bolyp tabylady.
Otyrysta qyzmet kórsetýdiń túrli salalaryndaǵy yntymaqtastyq máseleleri talqylandy. Saýda, ınvestısııalar, kólik jáne baılanys, aýyl sharýashylyǵy, energetıka, ónerkásip jáne taǵy basqa salalardaǵy atqarylǵan jumystar eki memlekettiń arasyndaǵy saýda kóleminiń ulǵaıýyna oń áser etýi tıis.
Talqylaý barysynda qazaqstandyq tarap úndi tarapyn metallýrgııa, tamaq, hımııa, mashına jasaý ónerkásibi jáne qurylys taýarlary sııaqty salalarda jalpy somasy 271,4 mln dollardy 60 túrli taýardy jetkize alatynyn aıtyp, Qazaqstannyń eksporttyq áleýetin ulǵaıtý múmkindigin jetkizdi. Áriptes elge Qazaqstan men Ortalyq Azııa elderinen Iran arqyly Úndistanǵa logıstıkalyq servıs usyndy.
Eki eldiń ónerkásiptik kooperasııasyn odan ári damytý maqsatynda bizdiń tarap Aýǵanstan men Úndistandy Ortalyq Azııamen jáne Eýropamen, Oral, Sibir jáne Qıyr shyǵys óńirlerimen baılanystyratyn «Soltústik-Ońtústik» Ortalyq Azııa kólik-tranzıttik ekonomıkalyq dálizin damytý týraly birlesken zertteý júrgizýdi usyndy.
2019 jyly Qazaqstan men Úndistan arasyndaǵy taýar aınalymy 1,9 mlrd AQSh dollaryn quraǵanyn aıta keteıik. Bul 2018 jylǵa qaraǵanda 55,8%-ǵa joǵary kórsetkish. Qazaqstannan Úndistanǵa jiberilgen eksport kólemi byltyr 65%-ǵa ósip, 1,6 mlrd dollarǵa jetti. Úndistannan keletin ımport bolsa 20,1-ǵa ulǵaıyp, 291,6 mln dollar boldy. Bıyl jeti aıda eki el arasyndaǵy taýar aınalymy 2,2 ese artqanyn da atap ótken lázim.
