Taraz qalasynyń ákimi Aıtqazy Qarabalaev oblys ortalyǵyndaǵy «Dosnar» saýda ortalyǵynda, F.Qypshaqbaev kóshesiniń boıyndaǵy «Korvet» saýda úıinde, «Shóldala» turǵyn alqabyndaǵy №55 orta mektepte, B.Momyshuly kóshesiniń boıyndaǵy «Asem-Ai» saýda úıinde jáne «Saltanat» shaǵyn aýdanyndaǵy №2 qalalyq emhana aýmaqtarynda tarazdyq turǵyndarmen kezdesti. Kópshilik ásirese turǵyn úı-kommýnaldyq sharýashylyq, jer kezegi men baspana máselesine qatysty máselelerdi kóterdi. Sonymen qatar aýlalardaǵy qýraǵan terekterdi qyrqý, balalar oıyn alańdaryn salý jáne jaryqtandyrý, kóshelerge asfalt tóseý jáne jóndeý, mektep tarapynan balalardy kompıýtermen qamtamasyz etý máseleleri aıtyldy. Qala ákimi turǵyndarǵa barlyq máseleniń kezegimen sheshiletinin jetkizdi. Jalpy, qoǵamdyq qabyldaý ótken bes kún ishinde Taraz turǵyndarynan 200-ge jýyq aryz-shaǵym men ótinish túsken. Bári de ákimdikke qarasty jaýapty mekemelerdiń tarapynan baqylaýǵa alyndy.
Sarysý aýdanynyń ákimi Baqytjan Jaqsylyqov Túrkistan aýyldyq okrýginiń ortalyǵy Áshir Búrkitbaev aýylynda bolyp, jergilikti turǵyndarmen kezdesti. Turǵyndar negizinen ákimge kóshe jaryǵy, jaıylymdyq jer konkýrsy jáne kásipkerlik maqsatta nesıe alý boıynsha suraqtar qoıdy. Máselen, aýyl turǵyny Ilespek Aıtjanov Úshbas aýylyna syrttan qatynap jumys isteıtin jas mamandarǵa eki páterli úı qajet ekenin jetkizdi. Bul oraıda B.Jaqsylyqov kásipkerlermen kelissózder júrgizilip jatqanyn, bul másele sheshimin tabatynyn aıtty. Al О́serbaı Dándibaevtyń Arystandy aýylyndaǵy Ámıt Asanov kóshesiniń jaryǵynyń jıi sónip qalatyny, sony aýystyrý kerektigi týraly suraǵyna aýdan ákimi onyń jobalyq-smetalyq qujattarynyń ázirlengenin, aldaǵy ýaqytta bıýdjettik komıssııadan qoldaý tapsa, oryndalatynyn aıtyp, jaýap berdi. Qoǵamdyq qabyldaýda jalpy 12 adam suraq qoıyp, tıisti jaýaptaryn aldy.
Talas aýdanynyń ákimi Baqyt Qazanbasov Qasqabulaq jáne Maıtóbe aýyldaryna baryp, jergilikti halyqpen júzdesti. Aýyl turǵyndary negizinen áleýmettik járdemaqy, ınternet jelisi, jer, kóshelerdi jóndeý jáne gaz tartý boıynsha másele kóterdi. Maıtóbe aýyldyq ardagerler keńesiniń tóraǵasy Qýandyq Satybaldıev aýyl kóshelerin asfalttaý kerektigin aıtsa, Aıtbek Qýatbekov A.Dáýletbekov atyndaǵy orta mektepke jóndeý jumystaryn júrgizý kerektigin jetkizdi. Qoǵamdyq qabyldaýǵa barlyǵy 55 adam qatysyp, suraq qoıdy. Qabyldaýda aıtylǵan aýyl turǵyndarynyń máselelerine oraı B.Qazanbasov ákimdikke qarasty bólim basshylaryna tapsyrma berdi. Atalǵan qoǵamdyq qabyldaý budan keıin Kóktal, Eseıhan, Tamdy aýyldarynda jalǵasyn tapty.
Qoǵamdyq kóshpeli qabyldaý Jýaly aýdanynda da ótip, aýdan ákimi Narbaı Ergebekov birqatar aýyl turǵyndarymen kezdesti. Qyzylaryq aýylynyń turǵyndary aýdan ákimine suraqtar qoıyp, jaýap aldy. Sondaı-aq Surym aýyly, Sarymsaqsaı kóshesiniń turǵyny Boranbek Kerimbaev aýyl kóshelerine aýyz sý tartý qajettigin aıtty. Aýyl turǵynynyń suraǵyna N.Ergebekov bıyl memleket qazynasynan qyrýar qarajat bólinip, aýdanǵa qarasty 15 aýylǵa aýyz sý qubyrlary tartylyp jatqanyn jetkizdi. Bul jumystardyń birqatary «Jumyspen qamtýdyń jol kartasy» baǵdarlamasynyń negizinde júzege asyrylyp jatyr eken. Onyń ishinde Qyzylaryq aýyldyq okrýginen Teris-Ashybulaq jáne Alataý aýyldary bar. Al, Surym aýylyn da taza aýyz sýmen qamtý máselesi aýdan ákimdiginiń josparynda tur. Qoǵamdyq kóshpeli qabyldaý barysynda okrýgtegi birqatar sharýa qojalyǵynyń basshylary egistik jerlerdi paıdalanýdaǵy kemshilikter men jumys barysynda týyndaǵan basqa da máselelerdi jetkizdi. Al aýdan ákimi N.Ergebekov kóptegen suraqtyń tıisti ákimdik bólimderiniń tarapynan baqylaýǵa alynatyndyǵyn aıtty. Kestege sáıkes, mundaı qoǵamdyq qabyldaý Bılikól, Jetitóbe, Kúreńbel aýyldyq okrýgterinde de ótti. Munda da turǵyndar negizinen aýylǵa gaz qubyryn tartý, aýyzsý jáne qaıtarymsyz grant alý máselelerin kóterdi. Qabyldaýda aıtylǵan máseleler boıynsha N.Ergebekov tıisti bólimderiniń tarapynan jaýap beriletindigin jetkizdi.
Memleket basshysynyń «Halyq únine qulaq asatyn memleket» tujyrymdamasyn júzege asyrý boıynsha Jambyl aýdanynyń ákimi Sáken Arýbaev Qarakemer, Tastóbe, Ashybulaq jáne basqa da aýyldarda boldy. Kóshpeli qoǵamdyq qabyldaý barysynda aýdannyń qurmetti ardageri Oshaqbaı Ybyraıymov oblystyq mańyzy bar «Taraz-Aqkól-Saýdakent» baǵytyndaǵy trassaǵa jol belgilerin ornatý, Qarakemer aýylyndaǵy mektep pen meshitke gaz qubyryn tartý kerektigin aıtty. Aýyl turǵyny Nurjan Qazaqbaev ta kógildir otynnyń qashan beriletinin surady. Sonymen qatar Dinahmet О́temǵalıev eńse kóterip kele jatqan aýyldyq klýb túrli úıirmelermen tolyqsa degen oıyn jetkizse, Doshoja Toqbergenov, Turdaly Týǵanbaev kásipkerlik nysan ashý, jer telimderin rásimdeý, agroholdıng qurylymynyń jaıy týraly aıtty. Al Ashybulaq aýyldyq okrýginiń turǵyny Turǵynbek Ońǵarbaev Shaıdana aýylyndaǵy Abaı kóshesin jaryqtandyrý kerektigin jetkizdi. Sondaı-aq Sálı Týbaev, Álıomar Esenamanov, Qýanysh Júrjaevtar Jambyl, Qapal kóshelerindegi elektr baǵanalarynyń ábden tozǵan máselesin kóterdi. Turǵyndardyń máselesin tyńdaǵan Jambyl aýdanynyń ákimi S.Arýbaev barlyq máseleniń tıisti mekemeler arqyly sheshimin tabatynyn jetkizdi.
Qordaı aýdanynyń ákimi Rústem Dáýlet aýdannyń birqatar aýyldarynda bolyp, turǵyndardy tolǵandyryp júrgen máselelerge nazar aýdardy. Máselen, Qarakemer aýylynyń turǵyny, dáriger Aqmaral Toqqojaeva jas mamandarǵa qashan páter beriletinin surady. Bul oraıda R.Dáýlet bıyl Qarakemer aýylynan 20 páterli 10 úı salynyp jatqanyn, olardyń aýylǵa jumys isteýge kelgen jas mamandarǵa, az qamtylǵan kópbalaly otbasylarǵa jáne múmkindigi shekteýli jandarǵa beriletinin jetkizdi. Al Shálen Imanbaev kún batareıalaryn ornatý boıynsha jeke kásibin ashqysy keletinin aıtyp, ákimnen tıisti jaýabyn aldy.
Baızaq aýdanynyń ákimi Nurjan Nurjigitov Býryl aýylynyń turǵyndarymen kezdesti. Ákimniń aıtýynsha, halyqty tolǵandyrǵan basty másele – aýyz sý bolyp otyr. Kezdesýge merdiger kompanııa, tehnıkalyq qadaǵalaý ókilderi men joba avtory qatysty. «О́zderińiz biletindeı, bıyl Býryl eldi mekeninde aýyz sý qubyry júrgizilýde. Turǵyndar júrgizilip jatqan jumystardyń sapasy men keıbir kóshelerdiń qalyp ketkenin aıtyp, narazylyq bildirdi. Al birneshe kóshege aýyz sý qubyry biraz jyl buryn júrgizilgenin aıtyp ótti. Turǵyndardyń aıtqan syn-eskertpelerin eskere otyryp, aýyl ishindegi belsendi 5 azamatty baqylaý komıssııasy retinde saılaýdy usyndym. Aldaǵy ýaqytta aýyldyq okrýg ákimi, turǵyn úı jáne kommýnaldyq sharýashylyq bóliminiń basshysy men turǵyndardyń ózderi saılaǵan azamattar osy jumystardyń barysyn baqylaıtyn bolady», deıdi N.Nurjigitov.
Shý aýdanynyń birqatar aýylynda da qoǵamdyq kóshpeli qabyldaý ótti. Oǵan aýdan ákimi Nurjan Kalenderov pen tıisti sala basshylary qatysty. Balýan Sholaq aýylynyń turǵyndary negizinen áleýmettik kómek, jumysqa ornalasý, densaýlyq saqtaý, jol salasyna qatysty suraqtar qoıdy. Máselen, aýyl turǵyny Zeınekúl Záýirbekova aýyldaǵy mádenıet úıiniń jaramsyzdyǵyn aıtyp, ákimnen ony qalpyna keltirýge kómektesýin surady. Nurjan Kalenderov óz sózinde atalǵan mádenıet úıin qalpyna keltirý úshin jobalyq-smetalyq qujattar daıyndaýǵa jergilikti bıýdjetten 2 mln teńge qarjy qarastyrylyp, qujattarynyń daıyndalyp jatqanyn aıtty. Al aýyl turǵyny Nurjamal Úsenbaeva medısınalyq jedel járdem kóligin jańartyp berýdi surady. Ákim búginde aýdandyq ortalyq aýrýhanaǵa tıesili 31 jedel járdem kóligi bar ekenin, taǵy 6 kólikke oblysqa tapsyrys berip otyrǵanyn jetkizdi. Eger jańa kólikter kelgen jaǵdaıda máseleniń sheshiletinin aıtty. Sonymen qatar, Balýan Sholaq aýylyna kelesi jyly gaz tartylatyn boldy. Sondaı-aq jergilikti turǵyndar aýyldaǵy elektr baǵanalarynyń eskirgendigin, ınternet jelisiniń nasharlyǵyn jetkizdi. Bul rette aýdan ákimi Nurjan Kalenderov «Búgingi tańda jalǵyz bir aýyl emes, aýdandaǵy biraz aýyldyń baǵanalary eskirgen. Atalǵan máseleni sheshý úshin kelesi jyly úlken joba jasap, baǵanalardy jańartý jumystaryn qolǵa alatyn bolamyz», deı kele, ınternet máselesin sheshý úshin de «Qazaqtelekom» mekemesimen kelisim jasalyp jatqanyn jetkizdi. Sonymen qatar Balýan Sholaq aýylymen birge Dalaqaınar, Shoqpar aýyldaryna da ınternet jelisi tartylatyn bolady.
T.Rysqulov aýdanynyń ákimi Erbolat Sadyrqulov Kógershin aýylynyń turǵyndarymen kezdesti. Aýyl turǵyndary ákimge aýyl kóshesin jóndeý, kóshelerdi jaryqtandyrý, aýyz sý kirgizý, ınternetke qoljetimdilik, nesıe alý, jer alý sııaqty ózekti máselelerdi jetkizdi. Aýdan ákimi jergilikti jurtshylyqtyń máselesin sheshý úshin tıisti sala basshylaryna tapsyrma berdi. Erbolat Sadyrqulov kóptiń kókeıindegi máselelerdiń basshylyqqa alynyp, aldaǵy ýaqyttarda oń sheshimin tabatyndyǵyn jetkizdi. Budan keıin kóshpeli qoǵamdyq qabyldaý T.Rysqulov aýdanynyń birqatar aýylynda jalǵasty.
Kóshpeli qoǵamdyq qabyldaý Merki aýdanynyń Aqaral aýyldyq okrýginde ótip, Jańatoǵan aýyldyq okrýginde jalǵasyn tapty. Qoǵamdyq qabyldaýǵa aýdan ákimi Meıirhan О́mirbekov qatysyp, turǵyndardyń máselelerin tyńdady. Aqaral aýylynda ótken kezdesýde ákim 12 suraqqa jaýap berip, 2 saýal baqylaýǵa alyndy. Sondaı-aq aýdannyń aýyldaryna qatysty ózekti máseleler sheshimin tabatyn boldy.
Jambyl oblysynyń ákimi Berdibek Saparbaevtyń tapsyrmasyna sáıkes Taraz qalasynyń jáne 10 aýdannyń ákimderi jergilikti jurtshylyqpen júzdesti. Ákimder áleýmettiń máselesine qulaq asyp, máseleleriniń oń sheshiletinin aıtyp, ýáde berdi. О́zekti máseleler basshylyqqa alynyp, tıisti oryndarǵa joldanatyn boldy.
Jambyl oblysy
