Jas urpaqty, tipti táni men jany saý barsha halyqty eptilikke baýlıtyn arqandy saıabaq ashý ıdeıasyn tótenshelikter kótergenimen, bul bastamany jergilikti ákimdik birden qoldap áketken. Shaǵan ózeniniń Jaıyqqa qosylar tusyndaǵy ásem múıiste ornalasqan bul saıabaq qala turǵyndary men qonaqtardyń demalys sátin áserli de paıdaly ótkizýine múmkindik beredi. Ári sport, ári oıyn túrinde belsendi demalys ásirese balalarǵa qatty unap jatyr.
Arqandy saıabaqtyń ashylýyna Oral qalasy ákiminiń orynbasary Ashat Qulbaev qatysyp, qala kúniniń qarsańynda tusaýyn kesip otyrǵan saıabaqtyń ashylý saltanatymen quttyqtady.
"Qazaqstanda turǵan jeri, tabıǵaty dál Oral sııaqty tamasha shahar kóp emes. Jasyl jelektiń arasynda, aǵyn sýdyń jaǵasynda ornalasqan bul saıabaqta demalý – janǵa da, tánge de shıpa beredi. Jáne osy keremetti jasaýǵa bıýdjet qarjysy jumsalǵan joq. Osy ıgilik qarapaıym halyq úshin jasalyp otyr", - dedi qala basshysynyń orynbasary.
Shynynda da arqandy saıabaqtyń barlyq jabdyǵyn Batys Qazaqstan oblystyq Tótenshe jaǵdaılar departamentiniń "О́rt sóndirý jáne avarııalyq qutqarý jumystary qyzmeti" óz kúshimen jasap shyqqan eken. Sondaı-aq saıabaqqa kelip demalý, aspaly atraksıondardy paıdalaný da aqysyz bolmaq.
