Rýhanııat • 15 Qyrkúıek, 2020

Izraılde ál-Farabıdiń 1150 jyldyǵyna arnalǵan eskertkish taqta ashyldy

529 ret kórsetildi

Bıyl uly fılosof ári ǵalym Ábý Nasyr ál-Farabıdiń týǵanyna 1150 jyl. Osyǵan oraı, Izraıldiń Haıfa qalasynda ǵulamaǵa eskertkish taqta ornatyldy, dep habarlaıdy Egemen.kz.

Eskertkish taqtanyń saltanatty ashylýyna Haıfa qalasy mýnısıpalıteti qoldaý kórsetken. Igi sharaǵa Qazaqstannyń Izraıldegi Qurmetti konsýly Devıd Lıýksembýrg, ǵalymdar, JOO basshylary men BAQ ókilderi qatysty.  Jıyn barysynda Qazaqstannyń Izraıldegi Elshisi Satybaldy Burshaqov ál-Farabıdyń taǵylymy men murasyna qatysty pikirin bildirip, onyń adamzat úshin mańyzdylyǵyn atap ótti. 

"Bıyl shyǵystyń Arıstoteli, ekinshi ustaz atanǵan Ábý Nasyr ál-Farabıdiń týǵanyna 1150 jyl. Ol tek qazaq halqy úshin emes, álem elderi úshin de ataýly meıram. Sondyqtan, osynaý tarıhı qalada uly oıshyl atyndaǵy kóshe boıynda eskertkish taqta ornatyldy. Bul ál-Farabı babamyzǵa degen qurmetimiz", dedi elshi. 

Saltanatty sharaǵa onlaın rejımde ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov ta qatysty.

"Uly babamyzdyń fılosofııasy bizge jáne keler urpaqqa úlken mura. Biz ál-Farabıdi taný arqyly álemdi tanımyz. Ál-Farabı atyndaǵy QazUÝ-de uly oıshyldyń ósıeti arqyly eliizdiń bolashaǵyn, jastardy tárbıelep otyrmyz", dedi rektor. 

Saltanatty rásimge qatysqan Halyqaralyq Túrki akademııasynyń prezıdenti, akademık  Darhan Qydyráli ál-Farabıdiń adamzat rýhanııatyndaǵy ornynyń erekshe ekenin, sondyqtan tarıhı Haıfa qalasyndaǵa ǵulamaǵa arnalǵan eskertkish taqta ornatylýy elimiz úshin qurmet ekenin atap ótti. 

"Ál-Farabıdiń áleýmettik fılosof retindegi mańyzy zor. Onyń áıgili "Izgi qala týraly" traktaty aldyńǵy urpaqtardyń rýhanı-fılosofııalyq tájirıbesin sińirip qana qoımaı, Batys Eýropadaǵy áleýmettik oıdyń, ásirese ýtopııalyq fılosoftardyń damýyna aıtarlyqtaı áser etti. Arıstotelden keıingi ekinshi ustazdyń atyndaǵy kóshe - dostyqtyń kóshesi bolǵaı. Barshańyzdy erekshe qýanyshpen quttyqtaımyn", dedi ol. 

Aıta keteıik, Izraıldiń Haıfa qalasynda ál-Farabı atyndaǵy kóshe 1960 jyly ashylǵan. 

 

 

Sońǵy jańalyqtar

Qazaqstanda dollar qymbattady

Ekonomıka • Keshe

Uqsas jańalyqtar