Qarýly kúshterdegi mańyzdy máseleniń biri – nysandardy qysqa daıyndaý. Osylaısha Qorǵanys mınıstrliginiń komıssııasy júrgizgen tekserý barysynda birneshe garnızonda ǵımarattardy, kazarmalardy, terezeler men qazandyqtardy jóndeýdiń aıaqtalmaǵandyǵy, jylytý jabdyǵynyń aqaýy anyqtaldy. Qorǵanys mınıstri bas qolbasshylarǵa jergilikti jerlerde jumys júrgizetin merdigerlerdiń jumysyn baqylaýdy kúsheıtý boıynsha mindetter qoıdy, sondaı-aq qurylys uıymdarynyń óz mindettemelerin oryndaýdyń qatań merzimderin belgiledi.
Qorǵanys vedomstvosynyń basshysy basty basymdyqtardyń biri – oq-dárilerdi saqtaý qaýipsizdigin qamtamasyz etý jumystary ekendigin atap ótti. Munda áli kúnge deıin sheshilmegen máseleler bar. Ýákiletti organ «Qaztehnologııa» AQ árdaıym jaramsyz oq-dárilerdi ýaqtyly kádege jarata bermeıtinin eskere otyryp, bas qolbasshylarǵa olardy paıdalanylmaıtyn áskerı múlik retinde ınjenerlik-saperlik bólimshelerdiń kúshimen joıý múmkindigin belgilengen tártippen pysyqtaý týraly nusqaý berildi. Qorǵanys mınıstri anyqtalǵan kemshilikterdi jedel joıýdy, al oq-dárilerdiń saqtalýyn tekserýdi Qorǵanys mınıstrliginiń, Bas shtabtyń, Bas ınspeksııanyń jáne áskerı polısııanyń komıssııalaryn tarta otyryp, turaqty túrde júzege asyrýdy tapsyrdy.
Basshylyq quram jeke quramnyń densaýlyǵyn saqtaý boıynsha jumysty kúsheıtýge erekshe nazar aýdardy. Qarýly Kúshterde áskerı qyzmetshilerge kúzgi-qysqy kezeńde kúsheıetin tumaý vırýsyna qarsy vaksınasııalaýdy uıymdastyrý boıynsha is-sharalar júrgizilýde. Vaksınany áskerı bólimderge jetkizý júzege asyrylýda, birinshi kezekte merzimdi qyzmettegi áskerı qyzmetshilerge, áskerı oqý oryndarynyń kýrsanttaryna, sondaı-aq sozylmaly aýrýlary bar «táýekel tobynyń» ókilderine kóńil bólinetin bolady.
Qorǵanys mınıstri Qarýly Kúshterde medısınalyq qamtamasyz etýdi jetildirý jónindegi júıeli sharalar spektrin keńeıtýge nusqaý berdi. Qorǵanys mınıstrligi tarapynan medısına mamandaryna ústemaqy tólenýde. Áskerı dárigerlerdi daıarlaý jáne áskerı qyzmetke shaqyrý josparlanǵan, sondaı-aq olardyń rezıdentýralar men ınternatýralarda, onyń ishinde sheteldik oqý oryndarynda óz biliktiligin arttyrý kózdelgen. Áskerı medısınalyq mekemelerge qazirgi zamanǵy medısınalyq jabdyqtardy, onyń ishinde stasıonarlyq jáne utqyr PTR-zerthanalardy jetkizý uıymdastyryldy.
О́tken aptada Mańǵystaý oblysynda áskerlerdiń túrli toptamasymen ótken keshendi oqý-jattyǵýdy qorytyndylaı kele, general-leıtenant Nurlan Ermekbaev jeke quramnyń joǵary daıarlyǵyna, arnaıy operasııalar kúshteriniń bólimsheleri kórsetken jaýyngerlik oqytýdyń jańa nysandary men ádisterin engizýdiń tıimdiligi men qajettiligine toqtaldy.
Atap aıtqanda, alǵash ret armııalyq taktıkalyq atystyń keshendi jattyǵýlary, áskerı qyzmetshilerdi psıhologııalyq daıarlaý ádistemesi kórsetildi.
Budan basqa, saqtalyp otyrǵan sanıtarlyq-epıdemııalyq shekteý sharalaryna qaramastan, tolyq kólemde oryndalýǵa tıis jaýyngerlik daıarlyq is-sharalaryn sapaly júrgizý jónindegi taıaý aradaǵy mindetter aıqyndaldy.
14 qyrkúıekte «Ońtústik» óńirlik qolbasshylyǵynyń, Desanttyq-shabýyldaý áskerleri men Áskerı-áýe kúshteriniń basqarý organdary men áskerı bólimderi tartylǵan «Aldaspan» jedel-taktıkalyq komandalyq-shtabtyq oqý-jattyǵýy bastaldy.
Aldaǵy aptada barlyq áskerlerde batalondyq taktıkalyq toptardyń daıarlyǵy aıaqtalady, sondaı-aq kóptegen komandalyq-shtabtyq jattyǵýlar men aýmaqtyq qorǵanys bólimshelerimen oqý-jattyǵýlar ótkiziledi.
