Eginjaıdaǵy eseli eńbek

Jyldyń tórt mezgilinde ýaqyt­pen sanaspaıtyn dala eńbekkerleri mańdaı termen ósirilgen altyn dándi shashaý­syz jınap alý úshin jantalasa qımyldaýda. Bul oraı­da, álmısaqtan berik eńbek dás­túri qalyptasqan. Qazir kóp sharýashylyqtar jumysty eki aýysymmen atqaryp jatyr. О́ıtkeni, ashyq sátti utymdy paıdalanyp qalýy kerek. Arqanyń sylbyraǵan jaýyny aıaq bastyrmaı, qyrýar egin qar astynda qalǵan da kez bolǵan. Osyndaı jaısyzdyqtan ashy sabaq alǵan dala erleri egin­jaıda túnep, el ıgiligin molaıtý jolynda jankeshti eńbek etýde. Eńbektiń eseli nátıjesi de bar.

Bıyl oblysta 4 427,7 myń gektar alqapqa jazdyq daqyldar tuqymy sebildi. Munyń ishinde bıdaı 3 698 myń gektardy, arpa 651,6 myń gektardy, suly 60 myń gek­tardy quraıdy. Sondaı-aq tary, qaraqumyq, noqat, burshaq, maıburshaq jáne jasymyq tuqymdary da byltyrǵy aýqymnan kóp sebildi.

Oraq jumysyna alǵashqylar qatarynda kirisken Sandyqtaý, Jarqaıyń, Jaqsy, Esil, Se­lınograd, Arshaly, Birjan sal, Atbasar, Býrabaı, Astrahan aýdandary bastapqy ekpindi tómen­detken joq. Oblystyq aýyl sha­rýashylyǵy basqarmasynyń derekterine súıensek, atalǵan óńir dıqandary búkil egistiktiń 81-91 paıyzyn jınap alsa, Zerendi aýdany tolyq aıaqtady. Jalpy óńirlik kórsetkishtiń 85 paıyzdan asýy ózge aýdandardyń da mejege búgin-erteńderi jetetinin baıqatady.

Qazirgi jaǵdaıdy taratyńqyrap aıtsaq, 14 qyrkúıektegi jaǵdaı bo­ıynsha dıqandar dándi daqyl­dardyń 3825,1 myń gektarynyń astyǵyn bas­tyrdy. Qazirshe gektar túsimdiligi 10,6 sentnerden aınalýda. Osyǵan baılanysty qyrmanǵa jetkizilgen astyqtyń kólemi de 4 030 myń tonnany qurap, byltyrǵy sáıkes merzimdegiden anaǵurlym asyp tústi. Buǵan qarap mynadaı esep jasaýǵa bolady: jumys jos­parynda belgilengenindeı, meha­nızatorlar keshegi kúni 266,6 myń gektardyń ónimin jınady. Iаǵnı, naýqandy aldyn ala bekitilgen jumys kúninde aıaqtaýǵa tolyq múmkindik týyp otyr. Buǵan aıtarlyqtaı negiz de bar. Naýqandyq jumystarǵa 8 145 astyq kombaıny, munyń ishinde 3 myńnan astam zamanalyq jo­ǵary ónimdiliktegi tehnıka qatys­tyrylýda.

Dıqandar qaýymy memleket tarapynan naýqandyq jumystarǵa 72,6 mlrd teńge bólingenine, mu­nyń 37,3 mlrd teńgesi qaıta­rym­­syz sýbsıdııalyq qarjy eken­digine rızashylyq bildirýde. Osyn­daı qoldaýdyń nátıjesinde agroóndiristik keshender men sharýa qojalyqtary sońǵy 3,5 jylda jalpy quny 23,5 mlrd teńgeniń 992 kombaınyn, 270 egis keshenderin satyp aldy. Kúzgi dala jumystaryn júrgizý úshin janar-jaǵar maı tıisti kólemde qorlanǵan. Aǵymdaǵy jylǵy as­tyq­ty qabyldaýǵa arnaıy lısenzııalanǵan 65 kásiporyn jumyldyrylýda. Bulardyń jalpy saqtaý syıymdylyǵy 4,2 mln tonnany quraıdy. Aıtylǵandarǵa qosymsha, jergilikti aýyl sharýa­shylyǵy qurylymdarynda shamamen 2,4 mln tonnalyq astyq qoımalary bar. Endigi maqsat – osy qýatty tıimdi paıdalaný.

Oblys dıqandary kelesi jyl­dyń molshylyǵyn qamdaý maqsa­tynda qazirdiń ózinde 515,9 myń tonna tuqym qoryn, ıaǵnı, mejelengen kólemniń 97,4 paıyzyn saılap úlgirdi. Munymen birge, barlyq alqapta kúzgi jer baptaý jumystary júrgizilip jatyr.

Aqmola oblysy