Nur-Sultandaǵy kóp páterli úılerdiń basym bóligi jylý qosýǵa daıyn. Atap aıtqanda, 2597 turǵyn úı nysandarynda osyǵan qajetti barlyq jumystar júrgizildi. Bul týraly qalalyq otyn-energetıkalyq keshen jáne kommýnaldyq sharýashylyq basqarmasy habarlady.
Vedomstvonyń málimetinshe, jylý berýge densaýlyq saqtaý nysandary da tolyq daıyn. 180 bilim berý mekemesiniń 178-i jylý qabyldaı alady, Mádenıet nysandary 86% daıyn. Elordada energııa kózderiniń negizgi jáne qosalqy jabdyqtaryn jóndeý 93,2% oryndaldy. Elordalyq otyn-energetıka kesheni jáne kommýnaldyq sharýashylyq basqarmasynyń málimetinshe, JEO-1 jylý berý maýsymyna 90,6% daıyn.
"Bul nysanda № 2 týrboagregat, № 4 sý jylytý qazandyǵy, № 6 sý jylytý qazandyǵy kúrdeli jóndeýden ótti. Qazirgi ýaqytta № 3 týrbogeneratordy, otyn-kólik sehyn, hımııalyq sehty, elektr sehyn, jylý avtomatıkasy men ólsheý sehyn jóndeý jalǵasýda", dep habarlady basqarma.
JEO-2 – 91,1% iske qosýǵa daıyn. Onda tórt týrboagregat, bes energetıkalyq jáne alty sý jylytý qazandyǵy jóndeldi. Qala mańyndaǵy alty turǵyn alabyna qyzmet kórsetetin "Astana-Energııa" AQ aýdandyq qazandyqtary 98% jumysqa daıyn. Búgingi kúni stansııalarda normatıvtik 20 táýliktik otyn qory jınaqtalǵan.
Ortalyqtandyrylǵan jylýmen jabdyqtaý, sýmen jabdyqtaý jáne sý burý júıeleriniń jylý jelileri jylytý maýsymyna tolyq daıyn. Elektr jelilerin jóndeý jaqynda aıaqtalady. Budan buryn habarlanǵandaı, elordada jylytý maýsymy kóshedegi ortasha táýliktik aýa temperatýrasy bes táýlik ishinde 10 gradýs jáne odan tómen bolǵan kezde bastalady.
Budan basqa, turǵyn úı alaptarynda gazben jabdyqtaý jelilerin salý boıynsha jáne tehnıkalyq sharttar berý jumystary jalǵasýda. Mysaly, Jeleznodorojnyı TA gaz taratý jelileri – 100% jabdyqtalsa, О́nerkásiptik jáne Kóktal-2 – 95%, Kóktal-1 – 80% salyndy. Bul jumystar Agrogorodok, Ońtústik-Shyǵys turǵyn alabynda da júrgizilýde. Osy turǵyn alaptardaǵy úıler, onyń ishinde Agroqalashyqtaǵy úılerdiń bir bóligi bıylǵy jylytý maýsymynda gazben jylytylýy múmkin.
Úılerdi gazben jabdyqtaý jelilerine qosylyp, tegin tehnıkalyq shart alý úshin turǵyn alaptarynda front-keńseler ashyldy. Sonymen qatar bıyl JEO-1 jáne JEO-2 qazandyqtaryn gazǵa kóshirý josparlanýda.
