Senat Tóraǵasy Máýlen Áshimbaev Memleket basshysy Joldaýda qorshaǵan ortany qorǵaý jáne ekologııalyq damý – elimiz úshin aldyńǵy kezekte turǵan mańyzdy másele dep atap ótkenin eske saldy.
"Joldaýda ulttyq saıabaqtar men basqa da tabıǵat baılyqtaryn zańdyq jaǵynan qorǵaý qajettiligine basa mán berildi. Osy rette búgin qabyldanǵan zań qorshaǵan ortany qorǵaý aıasyndaǵy birqatar mańyzdy máseleni oń sheshýge múmkindik beredi. Onyń ishinde Ile Alataýy memlekettik ulttyq tabıǵı parkiniń jerine qatysty máseleler bar. Bul jóninde Memleket basshysynyń naqty tapsyrma bergeni belgili. Búgin kópshilikti alańdatqan osy másele de zań aıasynda sheshimin taýyp otyr", dedi Senat Tóraǵasy Máýlen Áshimbaev.
Sonymen qatar senatorlar "Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly" zań jobasyn ekinshi oqylymda qarady. Senat Spıkeri Máýlen Áshimbaev bul zań jobasy ótken sessııadaǵy Palata otyrysynda birinshi oqylymda qaralyp, jan-jaqty talqylanǵanyn jetkizdi.
"Sybaılas jemqorlyqpen kúresti kúsheıtý memlekettik basqarý júıesindegi negizgi basymdyqtardyń biri ekeni belgili. Prezıdentimizdiń Joldaýynda da naqty tapsyrmalar berildi. Sondyqtan qazirgi tańda tıisti zań jobasyna júıeli túrde sybaılas jemqorlyqtyń aldyn alý máseleleri boıynsha qosymsha sharalar engizilip jatyr", dedi Máýlen Áshimbaev.
Zań memlekettik qyzmetshilerdiń otbasy múshelerine kez kelgen sıpattaǵy jáne qundy syılyqtardy berý múmkindigin boldyrmaýdy kózdeıdi.
Senat depýtaty Andreı Lýkın, óz kezeginde, jumys toby tıisti taldaý jasap, múddeli memlekettik organdarmen kezdesýler ótkizip, nátıjesinde zań jobasyna jańa túzetýler engizilgenin aıtty. Ekinshi oqylymnan keıin sybaılas jemqorlyqqa qatysty zań jobasy Májiliske qaıtaryldy.
Sonymen qatar, Senattyń jalpy otyrysynda depýtattar elimizdiń Premer-mınıstri Asqar Mamınniń atyna saýaldar joldady. Senator Dáýren Ádilbekovtiń saýaly shaǵyn jáne orta bıznesti qoldaý sharalaryna arnaldy. Muhtar Qul-Muhammed qashyqtan bilim berý máselelerin kóterdi. Erik Sultanov sýmen qamtamasyz etý jaǵdaıyna nazar aýdardy. Nurtóre Júsip kitaphanalar men mádenı ortalyqtar jóninde ulttyq baǵdarlama qabyldaý kerek ekenin aıtty. Aqylbek Kúrishbaevty azyq-túlik baǵasy tolǵandyrady. Al Lázzat Súleımen demografııa máseleleri boıynsha Strategııalyq josparlaý agenttiginiń tóraǵasyna júgindi.
