Aımaqtar • 18 Qyrkúıek, 2020

Halyqtyń úmiti – Prezıdentte Jergilikti basshylar senim údesinen shyǵa almaı otyr

96 ret kórsetildi

Burynda qalaı edi, aýyldaǵy máseleni aýyldyń ishinde-aq sheshe sala-tuǵyn. «Bas jarylsa – bórik ishinde, qol synsa – jeń ishinde» degendeı. Árıne, zaman basqa, zań basqa. Qazir ǵoı, halyq jergilikti bılikten góri, Prezıdentke tikeleı shyqqandy jón kóredi. Hat jazady, áleýmettik jeli arqyly beınejazba joldaıdy.

 

Máseleler jergilikti jerde sheshilýi tıis

Máseleniń túıinin turǵylyqty jeri­ńizdiń ákimi shesher edi ǵoı dese­ńiz, «aýyldaǵy ákimniń qolynda ne bar?» dep kúńk ete qalady el. Qalaı dese­ńiz de, shyndyq sol. Túptep kelgende, jergilikti basshylardyń qolyn­da basqarýdyń tetigi joq pa, álde ha­lyq­tyń seniminen shyqqan ba? Naqty mysaldar keltire otyryp, bul suraqtyń baıybyna baryp kórmek boldyq.

Memleket basshysy Qasym-Jomart Toqaev bıylǵy Joldaýynda «Ashyǵyn aıtýymyz kerek, memle­ket­tik organdarda áli de bolsa formalızm men jaıbasarlyq keńinen etek alyp otyr. Azamattarymyz ózderi­niń jergilikti deńgeıdegi másele­ler­i­men ortalyq mem­lekettik organ­darǵa júginip, Memleket basshysyna sha­ǵymdanýǵa májbúr», dep aıt­qan bolatyn. Shynynda da, jer­gilik­ti jer­degi basshylar sheshýi tıis máse­le­niń aıaǵy qurdymǵa ketken soń, amal joq halyq astanaǵa, Aqordaǵa shaǵym­danady.

Esterińizde bolsa, maýsym aıynda tender máselesine qatysty Aleksandr Fedosov, Bolat Baǵadaev, Anatolıı Tomılov, Aınash Sultanbekqyzy, taǵy da basqa kásipkerler oblysta qurylǵan arnaıy jumys tobyna senimsizdik bildirgen bolatyn. Sonda ashynǵan kásipkerler kúrmeýi qıyn tenderdiń suraǵy Úkimet deńgeıinde qaralsa, Prezıdent Qasym-Jomart Toqaev janaıqaıymyzǵa qulaq assa degen ótinishterin aıtqan edi. «Biz buǵan deıin qanshama ret oblystaǵy quzyrly organdarǵa shaǵymdanǵanbyz. Nátıje bolmady. Sondyqtan Memleket basshy­synan kómek suraýǵa májbúr bolyp otyrmyz», degen edi olar. Kásip­ker­lerdiń amaly qalmaı, jergilikti jerden úmit úzgen soń ǵana Memleket basshysynan kómek suraǵan. Muny bir dep qoıyńyz.

 

Shekara shebindegi aýylǵa aýyz sý kerek

О́tken aıda Tarbaǵataı aýdanyn­daǵy Tuǵyl aýylynyń turǵyndary áleýmettik jeli arqyly Prezıdentke arnaıy beınejazba joldady. Mun­daǵy qordalanyp qalǵan másele – aýyldaǵy aýyz sý edi.

«Qurmetti Qasym-Jomart Kemel­uly! Biz 5000 turǵynnyń jáne kóp­balaly analardyń atynan Sizden qol­daý suraımyz. Sebebi 2013 jyly «Aqbulaq» baǵdarlamasy boıynsha Qaırat Nábıevtiń basshylyǵyndaǵy merdiger kompanııa tenderdi utyp alǵan. Eki jyl ótti, sýdan paıda kóre almadyq. Oblys kóleminde eshqandaı nátı­je joq. Kúz bolsa mynaý. Biz endi esh­kimge senbeımiz. Sizdiń tikeleı kóme­gińiz kerek. Astanadan komıssııa jiberesiz be, ózińizdiń baqylaýyńyzǵa alasyz ba, aýyz sýǵa kómek kórsetińiz. Tu­ǵyldyqtardyń atynan kómek suraımyz», dep beınejazba joldaǵan.

Al jarııalanǵan jazbaǵa «osy máse­leni sheship bere almasa oblys, aýdan ákimderi ne úshin kerek? Mindetti túrde Prezıdent aralasyp sheshý kerek pe?» degendeı pikirler jazylǵan. О́te oryndy pikir. Jergilikti jerdiń máselesine jergilikti basshy aralasyp, halyqtyń jaǵdaıyn túzemese, ne qaıyr?!

Memleket basshysy Qasym-Jomart Toqaev: «Halyq únine qulaq asatyn memleket» – bul, shyn máni­sinde, «Ádiletti memleket» qurý tujy­rymdamasy. Azamattardyń másele­lerin tyńdap, kórip qana qoıý jetki­liksiz. Eń bastysy – durys jáne ádil sheshim shyǵarý qajet», degen.

Ras, kóp másele sóz júzinde qalyp, sońy sıyrquıymshaqtanyp ketedi. Ondaıǵa halyqtyń eti de úırengen. Tuǵyldyqtardyń kótergen máselesine berilgen jaýap ta sol, qur ýádeden aspaı kele jatqan sııaqty.

– Keshe ǵana sýdyń basyna baryp keldim. Senbiden bastap jumysty bas­taımyz degenderdiń eshqaısysy joq. О́tkende basshylar kelip, qol alysyp ketken. Aıtady, ketedi. Prezıdent halyq ıgiligin kórsin dep aýyz sýǵa aqsha bóldi ǵoı. Bular bolsa túk bitirgen joq. Kóshedegi kolonkalardy alyp tastaǵan soń el shyǵyndanyp, úıdi-úıine sý qubyryn tartqan. О́kinishke qaraı, qyzyǵyn úsh-aq aı kórdik. Qolymyzda kelisimshartqa deıin bar. Qazir ózimiz sýdy burynǵy qudyqtan alamyz. Ol tańǵy saǵat segizden keshki beske deıin ǵana isteıdi, – deıdi kópbalaly ana, zeınetker Nazıpa Keshýbaeva.

Degenmen kem-ketikti túzeý úshin atqarylatyn jumystardy Nur Otan par­tııasynyń Shyǵys Qazaqstan ob­lys­tyq fılıaly qadaǵalaýyna alyp­ty.

Tuǵyldyq turǵyndardyń aıtý­yn­sha, osydan eki jyl buryn sý tar­tyldy. Jergilikti basshylyq jumysy aıaq­talǵan nysandy qabyldap ta alǵan. Biraq halyq áli kúnge aýyz sýǵa jarymaı otyr. Atqarylǵan, dury­sy atqarylmaı qalǵan jumysqa mıl­lıondaǵan qarjy bólindi. Naqtyraq aıtsaq, sý qubyryn tartý jobasyna memleket bıýdjetinen 804 708 224 teńge bólingen kórinedi. Aýyldyqtar aýyz sýsyz otyra berse, jelge ushqan qarjy deı berińiz.

Bul aýyl shekara shebine taıaý jatyr. Taıaý jatqan aýyldyń bes myń­daı turǵyny bar. Negizgi sharýashy­lyqtary – balyq. Balyq demekshi, Pre­zıdent Joldaýynda balyq sharýa­shylyǵyna da kóńil bólý kerektigin aıtqan. Al jergilikti bılik ba­lyq­shy aýylyn qarapaıym aýyz sýmen qamtamasyz ete almaı otyrsa, sha­rýa­shylyqtaryn dóńgeletýge qaıtip jaǵ­daı jasamaq?!

«Halyq únine qulaq asatyn memleket» qurý úshin ne istemek kerek? Shyǵystaǵy shymbaıǵa batatyn azdy-kópti máselege sholý jasap kórdik. Ob­lys, aýdan, aýyl turǵyndary kó­keı­degi problemalardy alǵa tartyp, Prezıdentten kómek suraýdy jal­ǵastyra bermek. Jergilikti bılik she?!

 

Shyǵys Qazaqstan oblysy

 

Sońǵy jańalyqtar

Vırýs mýtasııaǵa ushyrady

Koronavırýs • Búgin, 17:27

Málik Ǵabdýllın: Zaman, tulǵa, jad

Rýhanııat • Búgin, 12:00

Atyraýdan 100 jigit áskerge attandy

Aımaqtar • Búgin, 10:35

Elimizde koronavırýstan 123 adam aıyqty

Qazaqstan • Búgin, 09:51

Uqsas jańalyqtar